abhi kuchh der ruk jate

abhī kuchh der ruk jaate

abhī kuchh kaam baaqī the

abhī tasvīr ko kuchh aur rangoñ kī zarūrat thī

abhī kāñToñ bhare rastoñ ko phūloñ kī zarūrat thī

abhī kuchh naqsh aise the jo yaksar nā-mukammal the

jahāñ bāġhoñ kā sochā thā vahāñ be-kār jangal the

bahut se ḳhvāb the jin kī abhī tā'bīr baaqī thī

abhī is shahr-e-be-ehsās kī tā'mīr baaqī thī

jo sach pūchho abhī insāf kī tahrīr baaqī thī

abhī kuchh zālimoñ ke zulm kī tā'zīr baaqī thī

abhī kuchh masjidoñ ke gumbadoñ ko sabz honā thā

jo firqa-sāz mimbar the unheñ zamzam se dhonā thā

abhī to ham ne nafrat ke sabhī mā'bad jalāne the

abhī ham ne mohabbat ke ka.ī parcham banāne the

abhī to qā.id-o-iqbāl ke bhī din manāne the

abhī to ham ne apne saare bām-o-dar sajāne the

abhī to mausamoñ ne bhī hameñ naġhme sunāne the

abhī rohī meñ bārish ne ka.ī chashme bahāne the

abhī sahrā-nashīñ bachchoñ kī ḳhushiyāñ rāste meñ thiiñ

abhī to ham ne cholistān meñ jhūle lagāne the

abhī kuchh der ruk jaate

abhī kuchh kaam baaqī the

abhī ham ne dar-o-dīvār kī hālat badalnī thī

abhī patjhaḌ-zada ashjār kī sūrat badalnī thī

abhī jo hukm dete the unheñ mahkūm honā thā

abhī jo zulm dhāte the unheñ mazlūm honā thā

abhī kuchh badshahoñ kī bādshāhī ḳhatm honī thī

abhī un bastiyoñ kī be-nigāhī ḳhatm honī thī

abhī to shahr meñ mere ka.ī tārīk raste the

abhī sahme hue schōl ke bachchoñ ke baste the

abhī to amn kī ham ne ka.ī sham'eñ jalānī thiiñ

abhī kuchh der ruk jaate

ki jab aisā añdherā ho

diye ko alvidā' kahnā

bahut taklīf detā hai

abhi kuchh der ruk jate

abhi kuchh kaam baqi the

abhi taswir ko kuchh aur rangon ki zarurat thi

abhi kanTon bhare raston ko phulon ki zarurat thi

abhi kuchh naqsh aise the jo yaksar na-mukammal the

jahan baghon ka socha tha wahan be-kar jangal the

bahut se KHwab the jin ki abhi ta'bir baqi thi

abhi is shahr-e-be-ehsas ki ta'mir baqi thi

jo sach puchho abhi insaf ki tahrir baqi thi

abhi kuchh zalimon ke zulm ki ta'zir baqi thi

abhi kuchh masjidon ke gumbadon ko sabz hona tha

jo firqa-saz mimbar the unhen zamzam se dhona tha

abhi to hum ne nafrat ke sabhi ma'bad jalane the

abhi hum ne mohabbat ke kai parcham banane the

abhi to qaid-o-iqbaal ke bhi din manane the

abhi to hum ne apne sare baam-o-dar sajaane the

abhi to mausamon ne bhi hamein naghme sunane the

abhi rohi mein barish ne kai chashme bahane the

abhi sahra-nashin bachchon ki KHushiyan raste mein thin

abhi to hum ne cholistan mein jhule lagane the

abhi kuchh der ruk jate

abhi kuchh kaam baqi the

abhi hum ne dar-o-diwar ki haalat badalni thi

abhi patjhaD-zada ashjar ki surat badalni thi

abhi jo hukm dete the unhen mahkum hona tha

abhi jo zulm dhate the unhen mazlum hona tha

abhi kuchh badshahon ki baadshahi KHatm honi thi

abhi un bastiyon ki be-nigahi KHatm honi thi

abhi to shahr mein mere kai tarik raste the

abhi sahme hue school ke bachchon ke baste the

abhi to amn ki hum ne kai sham'en jalani thin

abhi kuchh der ruk jate

ki jab aisa andhera ho

diye ko alwida' kahna

bahut taklif deta hai