abhi mausam nahin aaya

abhī tak mausam-e-gul lauT kar aayā nahīñ

kuchh der baaqī hai

abhī is dard kī chhāñv meñ sāñsoñ ko ravāñ rakhne kā hiila

DhūñDhnā hai

paañv meñ miTTī ke juute haath meñ kashkol-e-jāñ

sar par kulāh-e-ġham

qabā-e-gard meñ lipTe badan dīvār-e-girya se

lagā kar baiThnā hai aur

is mausam kā rasta dekhnā hai jis kī ḳhātir

ham ne apnī ḳhaak ke zarroñ se

apne ghar banā.e the

abhī kuchh der baaqī hai

abhī galiyoñ makānoñ kī chhatoñ par DevḌhiyoñ meñ ḳhāmushī

ḳhanjar-ba-kaf pahre pe faa.ez hai

yahāñ is qarya-e-ibrat meñ ik qasr-e-buland-o-pur-hashm hai

jis ke farsh-e-nīlmīñ par ek

amboh ġhulāmāñ saf-ba-saf ḳhālī suroñ ko apne

siine par jhukā.e

haath bāñdhe

apne aaqā se vafādārī kā dam bhartā hai

hājat-mand masā.il kī tarah be-vazan

lahje meñ suḳhan kartā hai jiitā hai na martā hai

zarā dekho

zarā is qarya-e-ibrat ke qasr-e-pur-hashm se us taraf dekho

havā mahbūs hai barg-o-samar se ḳhālī peḌoñ kī

barahna Tahniyoñ ke saath girheñ Daal kar bāñdhī

ga.ī hai aur

zamistāñ kī sunahrī dhuup TukḌe TukḌe

kar ke shahr kī ūñchī chhatoñ par chiil kavvoñ ke liye Daalī ga.ī hai

ātish-e-gul se charāġh-e-shām tak jo kuchh dil

ushshāq ko virse meñ miltā hai

asīrān-e-furāt-o-shām ke mānind

zanjīr-o-salāsil meñ piro kar sāhab-e-qasr-e-hasaham ke sāmne laayā gayā hai

pahra-vāroñ ne darīche

khiḌkiyāñ aur bhārī darvāze muqaffal kar diye haiñ

aur mausam un darīchoñ

khiḌkiyoñ aur bhārī darvāzoñ se bāhar sākit-o-jāmid khaḌā hai

bāzyābī kī ijāzat chāhtā hai

mātamī rañgoñ meñ Duubā dard kā mausam huzūr-e-shāh se

apne tan-e-nāzuk pe barg-e-gul sajāne kī himāyat chāhtā hai

beḌiyāñ pahne hue lab-basta-o-sākin havā ke paañv meñ

ḳhushbū kī paa.el bāñdhne aur phir use āzād karne

kī sa.ādat chāhtā hai

lekin

ai kār-e-junūñ

kār-e-numū āġhāz hone meñ abhī kuchh der baaqī hai

abhi tak mausam-e-gul lauT kar aaya nahin

kuchh der baqi hai

abhi is dard ki chhanw mein sanson ko rawan rakhne ka hila

DhunDhna hai

panw mein miTTi ke jute hath mein kashkol-e-jaan

sar par kulah-e-gham

qaba-e-gard mein lipTe badan diwar-e-girya se

laga kar baiThna hai aur

is mausam ka rasta dekhna hai jis ki KHatir

hum ne apni KHak ke zarron se

apne ghar banae the

abhi kuchh der baqi hai

abhi galiyon makanon ki chhaton par DewDhiyon mein KHamushi

KHanjar-ba-kaf pahre pe faez hai

yahan is qarya-e-ibrat mein ek qasr-e-buland-o-pur-hashm hai

jis ke farsh-e-nilmin par ek

amboh ghulaman saf-ba-saf KHali suron ko apne

sine par jhukae

hath bandhe

apne aaqa se wafadari ka dam bharta hai

hajat-mand masail ki tarah be-wazan

lahje mein suKHan karta hai jita hai na marta hai

zara dekho

zara is qarya-e-ibrat ke qasr-e-pur-hashm se us taraf dekho

hawa mahbus hai barg-o-samar se KHali peDon ki

barahna Tahniyon ke sath girhen Dal kar bandhi

gai hai aur

zamistan ki sunahri dhup TukDe TukDe

kar ke shahr ki unchi chhaton par chil kawwon ke liye Dali gai hai

aatish-e-gul se charagh-e-sham tak jo kuchh dil

ushshaq ko wirse mein milta hai

asiran-e-furaat-o-sham ke manind

zanjir-o-salasil mein piro kar sahab-e-qasr-e-hasaham ke samne laya gaya hai

pahra-waron ne dariche

khiDkiyan aur bhaari darwaze muqaffal kar diye hain

aur mausam un darichon

khiDkiyon aur bhaari darwazon se bahar sakit-o-jamid khaDa hai

bazyabi ki ijazat chahta hai

matami rangon mein Duba dard ka mausam huzur-e-shah se

apne tan-e-nazuk pe barg-e-gul sajaane ki himayat chahta hai

beDiyan pahne hue lab-basta-o-sakin hawa ke panw mein

KHushbu ki pael bandhne aur phir use aazad karne

ki saadat chahta hai

lekin

ai kar-e-junun

kar-e-numu aaghaz hone mein abhi kuchh der baqi hai