abhi waqt hai lauT jao

suno kasrat-e-ḳhāk meñ basne vaalo

suno tausan-e-barq-raftār par kaThiyāñ kasne vaalo

ye phir kaun se ma.arke kā irāda

tumhārī nasoñ meñ ye kis ḳhvāb-e-fāteh kā phir bāb-e-vahshat khulā hai

fasīloñ pe ik parcham-e-ḳhūñ-chakāñ gaaḌ dene kī niyyat

ka.ī laakh maftūh jismoñ ko phir hālat-e-sīna-kūbī meñ rote hue dekhne kī tamannā

ye kis āb-e-dīvāngī se badan kā subū bhar rahe ho

suno tum baḌī bad-numā raat kī dhund meñ faisla kar rahe ho

udhar saiñkaḌoñ kos par ik pahāḌī hai jis par koī shai nahīñ hai

vahāñ har taraf se tumheñ aag ke ġhol ghere meñ lene kī ḳhātir khaḌe haiñ

abhī vaqt hai luuT jaao

suno ujlat-e-fikr meñ koī bhī kaam anjām paatā nahīñ

phir kisī sā.at-e-shab-girafta meñ koī sitārā bulātā nahīñ

suno kasrat-e-KHak mein basne walo

suno tausan-e-barq-raftar par kaThiyan kasne walo

ye phir kaun se marke ka irada

tumhaari nason mein ye kis KHwab-e-fateh ka phir bab-e-wahshat khula hai

fasilon pe ek parcham-e-KHun-chakan gaD dene ki niyyat

kai lakh maftuh jismon ko phir haalat-e-sina-kubi mein rote hue dekhne ki tamanna

ye kis aab-e-diwangi se badan ka subu bhar rahe ho

suno tum baDi bad-numa raat ki dhund mein faisla kar rahe ho

udhar sainkaDon kos par ek pahaDi hai jis par koi shai nahin hai

wahan har taraf se tumhein aag ke ghol ghere mein lene ki KHatir khaDe hain

abhi waqt hai luT jao

suno ujlat-e-fikr mein koi bhi kaam anjam pata nahin

phir kisi saat-e-shab-girafta mein koi sitara bulata nahin