abstract art

abstract art kī dekhī thī numā.ish maiñ ne

kī thī az-rāh-e-muravvat bhī satā.ish maiñ ne

aaj tak donoñ gunāhoñ kī sazā paatā huuñ

log kahte haiñ ki kyā dekhā to sharmātā huuñ

sirf kah saktā huuñ itnā hī vo tasvīreñ thiiñ

yaar kī zulf ko suljhāne kī tadbīreñ thiiñ

ek tasvīr ko dekhā jo kamāl-e-fan thī

bhaiñs ke jism par ik uuñT kī sī gardan thī

Taañg khīñchī thī ki misvāk jise kahte haiñ

naak vo naak ḳhatarnāk jise kahte haiñ

naqsh-e-mahbūb musavvir ne sajā rakkhā thā

mujh se pūchho to tipā.ī pe ghaḌā rakkhā thā

bolī tasvīr jo maiñ ne use ulTā palTā

maiñ vo jaama huuñ ki jis kā nahīñ sīdhā ulTā

us ko naqqād to ik chashma-e-haivāñ samjhā

maiñ use hazrat-e-majnūñ kā garebāñ samjhā

ek tasvīr ko dekhā ki ye kyā rakkhā hai

varaq-e-sāf pe rañgoñ ko girā rakkhā hai

āḌī-tirchhī sī lakīreñ thiiñ vahāñ jalva-figan

jaise TuuTe hue ā.īne pe sūraj kī kiran

thā kiub-izm maiñ kāġhaz pe jo ik rashk-e-qamar

mujh ko īñTeñ nazar aatī thiiñ ise husn-e-bashar

bolā naqqād nazar aate yahī kuchh ham tum!

ḳhuld meñ hazrat-e-ādam jo na khāte gandum

abstract art ke malbe se ye daulat niklī

jis ko samjhā thā anannās vo aurat niklī

abstract art kī is chiiz pe dekhī hai asaas

''tan kī uryānī se behtar nahīñ duniyā meñ libās''

is numā.ish meñ jo atfāl chale aate the

Dar ke maaoñ ke kalejoñ se lipaT jaate the

abstract art ki dekhi thi numaish main ne

ki thi az-rah-e-murawwat bhi sataish main ne

aaj tak donon gunahon ki saza pata hun

log kahte hain ki kya dekha to sharmata hun

sirf kah sakta hun itna hi wo taswiren thin

yar ki zulf ko suljhane ki tadbiren thin

ek taswir ko dekha jo kamal-e-fan thi

bhains ke jism par ek unT ki si gardan thi

Tang khinchi thi ki miswak jise kahte hain

nak wo nak KHatarnak jise kahte hain

naqsh-e-mahbub musawwir ne saja rakkha tha

mujh se puchho to tipai pe ghaDa rakkha tha

boli taswir jo main ne use ulTa palTa

main wo jama hun ki jis ka nahin sidha ulTa

us ko naqqad to ek chashma-e-haiwan samjha

main use hazrat-e-majnun ka gareban samjha

ek taswir ko dekha ki ye kya rakkha hai

waraq-e-saf pe rangon ko gira rakkha hai

aaDi-tirchhi si lakiren thin wahan jalwa-figan

jaise TuTe hue aaine pe suraj ki kiran

tha kiub-izm main kaghaz pe jo ek rashk-e-qamar

mujh ko inTen nazar aati thin ise husn-e-bashar

bola naqqad nazar aate yahi kuchh hum tum!

KHuld mein hazrat-e-adam jo na khate gandum

abstract art ke malbe se ye daulat nikli

jis ko samjha tha anannas wo aurat nikli

abstract art ki is chiz pe dekhi hai asas

tan ki uryani se behtar nahin duniya mein libas

is numaish mein jo atfal chale aate the

Dar ke maon ke kalejon se lipaT jate the