abul-haul

jahān-e-reg ke ḳhvāb-e-girāñ se aaj to jaag

hazāroñ qāfile aate rahe guzarte rahe

koī jagā na sakā tujh ko tujh se kaun kahe

vo ziist maut hai jis meñ koī lagan ho na laag

taḌap uThe tire hoñToñ pe kaash ab koī raag

jo tere dīda-e-sañgīñ se dard ban ke bahe

ye terī tīra-shabī bijliyoñ ke naaz sahe

yūñhī sulagtī rahe tere dil meñ ziist kī aag

magar nahīñ, tū agar merā rāz-dāñ hotā

tire laboñ pe dahak uThtī koī pyaar kī baat

to aaj dahr ke siine pe tū kahāñ hotā

tire sukūñ ko kabhī chhū sakā na vaqt kā haat

ḳhud apnī aag hī meñ jal-bujhī hai merī hayāt

vagarna terī tarah maiñ bhī jāvedāñ hotā

jahan-e-reg ke KHwab-e-giran se aaj to jag

hazaron qafile aate rahe guzarte rahe

koi jaga na saka tujh ko tujh se kaun kahe

wo zist maut hai jis mein koi lagan ho na lag

taDap uThe tere honTon pe kash ab koi rag

jo tere dida-e-sangin se dard ban ke bahe

ye teri tira-shabi bijliyon ke naz sahe

yunhi sulagti rahe tere dil mein zist ki aag

magar nahin, tu agar mera raaz-dan hota

tere labon pe dahak uThti koi pyar ki baat

to aaj dahr ke sine pe tu kahan hota

tere sukun ko kabhi chhu saka na waqt ka hat

KHud apni aag hi mein jal-bujhi hai meri hayat

wagarna teri tarah main bhi jawedan hota