tere mere jism-e-pur-asrar mein

qabl aziiñ ki nā-rasā idrāk se

tah-ba-tah hone na hone ke

ma.anī ko to suljhāne lage

us haqīqat ko samajh

dafn thā sadiyoñ se jo zer-e-zamīñ

kaise us īñdhan kī garmī ke tufail

beach paude ban ke lahrāne lage

qabl aziiñ ki terā fikr-e-mūshigāf

maġhz-e-insāñ aur a.azā-e-badan ke darmiyāñ

un reshoñ ke har har lachchhe ke gird

jin meñ dil kī barq-rau maujeñ ravāñ haiñ

jin meñ ehsāsāt kī mahtābiyāñ haiñ

gardishoñ par gardisheñ khāne lage

us haqīqat ko samajh

kyuuñ koī be-barq zarra

ik anokhī dhaat ke

nuqta markaz ke bārūdī anāsir se

ma.an kuchh aise Takrāne lage

dekhte hī dekhte

nuqta markaz kā jaadū bhak se uḌ jaane lage

har tasādum ke amal kā

ek sā radd-e-amal

ek se radd-e-amal kā silsila

be-karāñ taḳhayyul kī uḌtī hadoñ se māvarā

lā-intihā

maiñ ne maanā

ham bhī sirf ek musht-e-ḳhāk haiñ

pal agar chale baneñ to ham ḳhas-o-ḳhāshāk haiñ

lekin aatā hai ḳhayāl

inshifāq ik zarra-e-na-chīz kā

jab badal saktā hai tā-hadd-e-nazar

qumqumoñ kī jagmagāhaT ke tajallī-zār meñ

phir ta.ajjub kyuuñ

agar dekhūñ meñ jo har kī tavānā.ī kā

sail-e-be-karāñ

ḳhīra-kunāñ

zarroñ ke har āvāra-gard ambār meñ

tere mere jism-e-pur-asrār meñ

qabl azin ki na-rasa idrak se

tah-ba-tah hone na hone ke

mani ko to suljhane lage

us haqiqat ko samajh

dafn tha sadiyon se jo zer-e-zamin

kaise us indhan ki garmi ke tufail

beach paude ban ke lahrane lage

qabl azin ki tera fikr-e-mushigaf

maghz-e-insan aur aaza-e-badan ke darmiyan

un reshon ke har har lachchhe ke gird

jin mein dil ki barq-rau maujen rawan hain

jin mein ehsasat ki mahtabiyan hain

gardishon par gardishen khane lage

us haqiqat ko samajh

kyun koi be-barq zarra

ek anokhi dhat ke

nuqta markaz ke barudi anasir se

man kuchh aise Takrane lage

dekhte hi dekhte

nuqta markaz ka jadu bhak se uD jaane lage

har tasadum ke amal ka

ek sa radd-e-amal

ek se radd-e-amal ka silsila

be-karan taKHayyul ki uDti hadon se mawara

la-intiha

main ne mana

hum bhi sirf ek musht-e-KHak hain

pal agar chale banen to hum KHas-o-KHashak hain

lekin aata hai KHayal

inshifaq ek zarra-e-na-chiz ka

jab badal sakta hai ta-hadd-e-nazar

qumqumon ki jagmagahaT ke tajalli-zar mein

phir tajjub kyun

agar dekhun mein jo har ki tawanai ka

sail-e-be-karan

KHira-kunan

zarron ke har aawara-gard ambar mein

tere mere jism-e-pur-asrar mein