adab ke nam pe

adab ke naam pe tahzīb ke luTeroñ ne

jo kār-hā-e-numāyāñ kiye kahūñ kaise

kisī ne sher meñ phabtī kasī ba-īñ maqsad

kahā gayā kabhī uryāñ-nigār ko fankār

jadīdiyat ke taqāze nibhā diye lekin

qabā-e-sharm-o-hayā tār-tār kar Daalī

mizāh kah ke phalāñgī ga.iiñ hudūd-e-adab

ġhulū ke naam pe kuchh log be-hijāb hue

kisī ne jins pe bebāk sher likh Daale

kisī ne vasl ke lamhāt be-naqāb kiye

ġhazal kī aaḌ meñ kuchh ne nikālā dil kā ġhubār

to koī parda-e-nasrī meñ chhup ke khul khelā

sitam to ye hai ki iffat kā naam le kar hī

uḌaa.ī jaatī rahīñ dhajjiyāñ sharāfat kī

mazīd ye ki ye qazzāq-e-shahr-e-ilm-o-adab

samajh rahe haiñ ki un ko adab meñ naam milā

adab ke nam pe tahzib ke luTeron ne

jo kar-ha-e-numayan kiye kahun kaise

kisi ne sher mein phabti kasi ba-in maqsad

kaha gaya kabhi uryan-nigar ko fankar

jadidiyat ke taqaze nibha diye lekin

qaba-e-sharm-o-haya tar-tar kar Dali

mizah kah ke phalangi gain hudud-e-adab

ghulu ke nam pe kuchh log be-hijab hue

kisi ne jins pe bebak sher likh Dale

kisi ne wasl ke lamhat be-naqab kiye

ghazal ki aaD mein kuchh ne nikala dil ka ghubar

to koi parda-e-nasri mein chhup ke khul khela

sitam to ye hai ki iffat ka nam le kar hi

uDai jati rahin dhajjiyan sharafat ki

mazid ye ki ye qazzaq-e-shahr-e-ilm-o-adab

samajh rahe hain ki un ko adab mein nam mila