adam ka KHala

havā ke jhoñke idhar jo aa.eñ to un se kahnā

yahāñ koī aisī shai nahīñ jise vo le jaa.eñ saath apne

yahāñ koī aisī shai nahīñ jise koī dekh kar ye soche

ki ye hamāre bhī paas hotī

yahāñ koī rāh-rau nahīñ hai na koī manzil

yahāñ añdherā nahīñ ujālā nahīñ koī shai nahīñ hai

guzarte lamhoñ ke ātishīñ paañv is jagah pai-ba-pai ravāñ haiñ

har ek shai ko sujhāte jaate har ek shai ko jalāte jaate miTāte jaate

har ek shai ko sujhāte jaate ki kuchh nahīñ hast se bhī hāsil

havā ke jhoñke idhar jo aa.eñ to un se kahnā

ye sab ma.ābid ye shahr gaañv

fasāna-e-zīst ke nishāñ haiñ

magar har ik dar pe jā ke dekhā har ek dīvār rauñd Daalī har ek rauzan ko dil samajh kar

ye bhed jaanā

guzarte lamhoñ ke ātishīñ paañv har jagah pai-ba-pai ravāñ haiñ

kahīñ miTāte kahīñ miTāne ke vāste naqsh-e-nau banāte

hayāt-e-rafta hayāt-e-ā.inda se milegī ye kaun jaane

havā ke jhoñke idhar jo aa.eñ to un se kahnā

har jagah daam dūriyoñ kā bichhā huā hai

har ik jagah vaqt ek ifrīt kī tarah yuuñ khaḌā huā hai

ki jaise vo kā.enāt kā aks-e-be-karāñ ho

kabhī fareb-e-ḳhayāl ban kar kabhī kabhī bhuul kar shu.ūr-e-jamāl ban kar

shikār kī nā-tavāñ nazar ko sujhā rahā hai

har ek shai se mirā nishān-e-adam ayaañ hai

adam bhī daryūza-gar hai merā mire hī bal par ravāñ-davāñ hai

havā ke jhoñke idhar jo aa.eñ to un se kahnā

fasāna-e-zīst kā jhulastā huā ujālā bhī miT chukā hai

magar ho miT kar koī añdherā nahīñ banā hai

ki is jagah to koī añdherā nahīñ ujālā nahīñ yahāñ koī shai nahīñ hai

hawa ke jhonke idhar jo aaen to un se kahna

yahan koi aisi shai nahin jise wo le jaen sath apne

yahan koi aisi shai nahin jise koi dekh kar ye soche

ki ye hamare bhi pas hoti

yahan koi rah-rau nahin hai na koi manzil

yahan andhera nahin ujala nahin koi shai nahin hai

guzarte lamhon ke aatishin panw is jagah pai-ba-pai rawan hain

har ek shai ko sujhate jate har ek shai ko jalate jate miTate jate

har ek shai ko sujhate jate ki kuchh nahin hast se bhi hasil

hawa ke jhonke idhar jo aaen to un se kahna

ye sab maabid ye shahr ganw

fasana-e-zist ke nishan hain

magar har ek dar pe ja ke dekha har ek diwar raund Dali har ek rauzan ko dil samajh kar

ye bhed jaana

guzarte lamhon ke aatishin panw har jagah pai-ba-pai rawan hain

kahin miTate kahin miTane ke waste naqsh-e-nau banate

hayat-e-rafta hayat-e-ainda se milegi ye kaun jaane

hawa ke jhonke idhar jo aaen to un se kahna

har jagah dam duriyon ka bichha hua hai

har ek jagah waqt ek ifrit ki tarah yun khaDa hua hai

ki jaise wo kaenat ka aks-e-be-karan ho

kabhi fareb-e-KHayal ban kar kabhi kabhi bhul kar shuur-e-jamal ban kar

shikar ki na-tawan nazar ko sujha raha hai

har ek shai se mera nishan-e-adam ayan hai

adam bhi daryuza-gar hai mera mere hi bal par rawan-dawan hai

hawa ke jhonke idhar jo aaen to un se kahna

fasana-e-zist ka jhulasta hua ujala bhi miT chuka hai

magar ho miT kar koi andhera nahin bana hai

ki is jagah to koi andhera nahin ujala nahin yahan koi shai nahin hai