adam katha

maiñ mohabbat kartā aur zinda rahnā bhuul chukī huuñ

aur khilaunoñ ke na.e kārobār kā lutf uThā rahī huuñ

khilaune mujhe bech rahe haiñ

maut ke hāthoñ

jo zarūratoñ aur zarūratoñ kī takmīl ke bahrūp badaltī hai

khilaune mujhe chābī dete haiñ

aur sub.h ho jaatī hai

shaam hote hote chābī ḳhatm hotī hai

aur zehn meñ bhaḌakte hue sho.aloñ

yā dil meñ chubhtī huī ThanDak kī tarah yādeñ

raat ban jaatī haiñ

jaise kisī bhūke naukar ko kaam karvāne kī majbūrī meñ

mazīd bhūkā rakkhā jaatā hai

vo merī āñkhoñ meñ jhāñke banā so jaatā hai

vajūd tak pahuñchne vaale kabhī na kiye jaane vaale safar ke liye

vo āsmān tak jaanā chāhtā hai

aur maiñ ghar kī dīvāreñ buland karnā chāhtī huuñ

khilaune apnā vajūd mere dil se ugāte haiñ

aur mujhe yaqīn hai

vo vajūd rakhte haiñ

aur meñ in saare majbūr dinoñ kī tarah

adam ban chukī huuñ

main mohabbat karta aur zinda rahna bhul chuki hun

aur khilaunon ke nae karobar ka lutf uTha rahi hun

khilaune mujhe bech rahe hain

maut ke hathon

jo zaruraton aur zaruraton ki takmil ke bahrup badalti hai

khilaune mujhe chabi dete hain

aur subh ho jati hai

sham hote hote chabi KHatm hoti hai

aur zehn mein bhaDakte hue shoalon

ya dil mein chubhti hui ThanDak ki tarah yaaden

raat ban jati hain

jaise kisi bhuke naukar ko kaam karwane ki majburi mein

mazid bhuka rakkha jata hai

wo meri aankhon mein jhanke bana so jata hai

wajud tak pahunchne wale kabhi na kiye jaane wale safar ke liye

wo aasman tak jaana chahta hai

aur main ghar ki diwaren buland karna chahti hun

khilaune apna wajud mere dil se ugate hain

aur mujhe yaqin hai

wo wajud rakhte hain

aur mein in sare majbur dinon ki tarah

adam ban chuki hun