adam se pare

vo jagmagātā huā shahr merī āñkhoñ meñ

tamām raat laraztā hai

āñsuoñ kī tarah

kabhī sisaktā hai TuuTe hue manāroñ meñ

kabhī Tapaktā hai āvāza-e-bahār kī sūrat

hisāb qatra-e-ashk

ā.īna sutūnoñ kā

mire bujhe hue chehre ke sāmne aa kar

pukārtā hai

chale aao jaan ahd guzishta

vo sā.ebān bahut intizār kartā hai

ujaḌ ga.ī hai takallum kī bastiyāñ

lekin

nishāniyāñ ka.ī baaqī haiñ

bujhtī huī be-zabāñ fazāoñ meñ

hurūf o saut o sadā ke ġhubār kī sūrat

kushāda āñganoñ kā surma.ī añdherā laraztā hai

kuchh parindoñ kī

aalam panāh āñkhoñ meñ

vo jagmagātā huā shahr

ek qila-e-āshuftagāñ bhī hai

jis se

har ek ḳhvāb adam

sar paTaktā rahtā hai

wo jagmagata hua shahr meri aankhon mein

tamam raat larazta hai

aansuon ki tarah

kabhi sisakta hai TuTe hue manaron mein

kabhi Tapakta hai aawaza-e-bahaar ki surat

hisab qatra-e-ashk

aaina sutunon ka

mere bujhe hue chehre ke samne aa kar

pukarta hai

chale aao jaan ahd guzishta

wo saeban bahut intizar karta hai

ujaD gai hai takallum ki bastiyan

lekin

nishaniyan kai baqi hain

bujhti hui be-zaban fazaon mein

huruf o saut o sada ke ghubar ki surat

kushada aanganon ka surmai andhera larazta hai

kuchh parindon ki

aalam panah aankhon mein

wo jagmagata hua shahr

ek qila-e-ashuftagan bhi hai

jis se

har ek KHwab adam

sar paTakta rahta hai