adhuri aarzu

kabhī maiñ sochtā huuñ

ḳhol se apne nikal kar

ik parinde kī tarah

bādal ko chhū luuñ

yā kabhī jharne meñ bachchoñ kī tarah

kilkāriyāñ bhar kar

uchhālūñ aap apne jism par paanī

kabhī jā kar samundar ke kināre

ret par leTūñ

gharauñde ret ke ta.amīr kar ke

ek Thokar se girā duuñ

yā kisī masrūf sī shah-rāh par jā.ūñ

vahāñ chīḳhūñ hañsūñ gā.ūñ

kabhī fōtpath par ruk kar

dahī ke gol-gappe khā ke chaTḳhāre bharūñ

yā phir adab aur sher kī koī siqa mahfil meñ jā.ūñ

aur vahāñ khillī uḌā.ūñ

jab mujhe sab chauñk kar hairat se ghūreñ to

ḳhushī se jhuum jā.ūñ

apne hoñToñ se hañsī kā ek favvāra uḌā kar

bhaag niklūñ

haañ magar in meñ se koī baat bhī mumkin nahīñ hai

kyoñ ki

maiñ to apne ḳhol meñ

mahsūr rahtā huuñ

hamesha qaid rahtā huuñ

kabhi main sochta hun

KHol se apne nikal kar

ek parinde ki tarah

baadal ko chhu lun

ya kabhi jharne mein bachchon ki tarah

kilkariyan bhar kar

uchhaalun aap apne jism par pani

kabhi ja kar samundar ke kinare

ret par leTun

gharaunde ret ke tamir kar ke

ek Thokar se gira dun

ya kisi masruf si shah-rah par jaun

wahan chiKHun hansun gaun

kabhi footpath par ruk kar

dahi ke gol-gappe kha ke chaTKHare bharun

ya phir adab aur sher ki koi siqa mahfil mein jaun

aur wahan khilli uDaun

jab mujhe sab chaunk kar hairat se ghuren to

KHushi se jhum jaun

apne honTon se hansi ka ek fawwara uDa kar

bhag niklun

han magar in mein se koi baat bhi mumkin nahin hai

kyon ki

main to apne KHol mein

mahsur rahta hun

hamesha qaid rahta hun