adl-e-faruqi ka ek namuna

ek din hazrat-e-fārūq ne mimbar pe kahā

kyā tumheñ hukm jo kuchh duuñ to karoge manzūr

ek ne uTh ke kahā ye ki na māneñge kabhī

ki tire adl meñ ham ko nazar aatā hai futūr

chādareñ māl-e-ġhanīmat meñ jo ab ke aa.iiñ

sehan-e-masjid meñ vo taqsīm huiiñ sab ke huzūr

un meñ har ek ke hisse meñ faqat ik aa.ī

thā tumhārā bhī vahī haq ki yahī hai dastūr

ab jo ye jism pe tere nazar aatā hai libās

ye usī luuT kī chādar se banā hogā zarūr

muḳhtasar thī vo ridā aur tirā qad hai darāz

ek chādar meñ tirā jism na hogā mastūr

apne hisse se ziyāda jo liyā tū ne to ab

tū ḳhilāfat ke na qābil hai na ham haiñ māmūr

garche vo had-e-manāsib se baḌhā jaatā thā

sab ke sab mohr-ba-lab the che inaas o che zakūr

rok de koī kisī ko ye na rakhtā thā majāl

nashsha-e-adl-o-masāvāt se sab the maḳhmūr

apne farzand se fārūq-e-mo.azzam ne kahā

tum ko hai hālat-e-aslī kī haqīqat pe ubuur

tumhīñ de sakte ho is kā mirī jānib se javāb

ki na pakḌe mujhe mahshar meñ mirā rabb-e-ġhafūr

bole ye ibn-e-umar sab se muḳhātib ho kar

is meñ kuchh vālid-e-mājid kā nahīñ jurm o qusūr

ek chādar meñ jo puurā na huā un kā libās

kar sakī is ko gavārā na mirī tab-e-ġhayūr

apne hisse kī bhī maiñ ne unheñ chādar de dī

vāqi.a kī ye haqīqat hai ki jo thī mastūr

nukta-chīñ ne ye kahā uTh ke ki haañ ai fārūq

hukm de ham ko ki ab ham use māneñge zarūr

ek din hazrat-e-faruq ne mimbar pe kaha

kya tumhein hukm jo kuchh dun to karoge manzur

ek ne uTh ke kaha ye ki na manenge kabhi

ki tere adl mein hum ko nazar aata hai futur

chadaren mal-e-ghanimat mein jo ab ke aain

sehan-e-masjid mein wo taqsim huin sab ke huzur

un mein har ek ke hisse mein faqat ek aai

tha tumhaara bhi wahi haq ki yahi hai dastur

ab jo ye jism pe tere nazar aata hai libas

ye usi luT ki chadar se bana hoga zarur

muKHtasar thi wo rida aur tera qad hai daraaz

ek chadar mein tera jism na hoga mastur

apne hisse se ziyaada jo liya tu ne to ab

tu KHilafat ke na qabil hai na hum hain mamur

garche wo had-e-manasib se baDha jata tha

sab ke sab mohr-ba-lab the che inas o che zakur

rok de koi kisi ko ye na rakhta tha majal

nashsha-e-adl-o-masawat se sab the maKHmur

apne farzand se faruq-e-moazzam ne kaha

tum ko hai haalat-e-asli ki haqiqat pe ubur

tumhin de sakte ho is ka meri jaanib se jawab

ki na pakDe mujhe mahshar mein mera rabb-e-ghafur

bole ye ibn-e-umar sab se muKHatib ho kar

is mein kuchh walid-e-majid ka nahin jurm o qusur

ek chadar mein jo pura na hua un ka libas

kar saki is ko gawara na meri tab-e-ghayur

apne hisse ki bhi main ne unhen chadar de di

waqia ki ye haqiqat hai ki jo thi mastur

nukta-chin ne ye kaha uTh ke ki han ai faruq

hukm de hum ko ki ab hum use manenge zarur