afkar pareshan

duniyā-e-rang-o-bū se mohabbat nahīñ rahī

ab gul-ruḳhān-e-dahr kī chāhat nahīñ rahī

yā-rab ye kis maqām par ab aa gayā huuñ maiñ

bezār dil ko un se bhī ulfat nahīñ rahī

bīmār-e-ġham kī chāragarī ab na kījiye

is ko kisī ilaaj kī hājat nahīñ rahī

āzurda mujh ko dekh ke kahte haiñ sab rafīq

kyā ho gayā tumheñ ki bashāshat nahīñ rahī

jo kuchh kahā kisī ne vo chupke se sun liyā

duniyā se ab ulajhne kī himmat nahīñ rahī

dushvārī-e-hayāt se hai qāfiya hī tang

aise meñ sher kahne kī fursat nahīñ rahī

taqdīr ne bhī apnī nazar mujh se pher lī

jab se tumhārī chashm-e-ināyat nahīñ rahī

is ālam-e-vajūd pe tanqīd kyā karūñ

ab mujh ko aib-jūī kī aadat nahīñ rahī

jalva har ek shai meñ hai parvardigār kā

dil ko kisī bhī chiiz se nafrat nahīñ rahī

terī tajalliyoñ se huā dil bhī jām-e-jam

is aa.ine pe gard-e-kudūrat nahīñ rahī

yā duur bhāgtā thā maiñ apnoñ ke naam se

yā dushmanoñ se bhī mujhe vahshat nahīñ rahī

zar hai kasauTī azmat-e-insāñ kī āj-kal

ilm-o-hunar kī ab koī vaq.at nahīñ rahī

tahzīb-e-nau ne dekhiye kyā gul khilā.e haiñ

mafqūd hai ḳhulūs muravvat nahīñ rahī

go auratoñ meñ jazba-e-īsār ḳhatm hai

mardoñ meñ bhī hamiyyat-o-ġhairat nahīñ rahī

bāzār garm rahtā hai makr-o-fareb kā

sidq-o-safā kī ab koī qīmat nahīñ rahī

hai aadmī kī zaat se larzāñ ḳhud aadmī

ahl-e-jahāñ ke dil meñ uḳhuvvat nahīñ rahī

lahore kyā chhuTā ki zamāna badal gayā

arbāb-e-zauq-o-shauq kī sohbat nahīñ rahī

kyā baat hai ki ab tire sheroñ meñ ai 'bahār'

vo soz vo taḌap vo harārat nahīñ rahī

duniya-e-rang-o-bu se mohabbat nahin rahi

ab gul-ruKHan-e-dahr ki chahat nahin rahi

ya-rab ye kis maqam par ab aa gaya hun main

bezar dil ko un se bhi ulfat nahin rahi

bimar-e-gham ki chaaragari ab na kijiye

is ko kisi ilaj ki hajat nahin rahi

aazurda mujh ko dekh ke kahte hain sab rafiq

kya ho gaya tumhein ki bashashat nahin rahi

jo kuchh kaha kisi ne wo chupke se sun liya

duniya se ab ulajhne ki himmat nahin rahi

dushwari-e-hayat se hai qafiya hi tang

aise mein sher kahne ki fursat nahin rahi

taqdir ne bhi apni nazar mujh se pher li

jab se tumhaari chashm-e-inayat nahin rahi

is aalam-e-wajud pe tanqid kya karun

ab mujh ko aib-jui ki aadat nahin rahi

jalwa har ek shai mein hai parwardigar ka

dil ko kisi bhi chiz se nafrat nahin rahi

teri tajalliyon se hua dil bhi jam-e-jam

is aaine pe gard-e-kudurat nahin rahi

ya dur bhagta tha main apnon ke nam se

ya dushmanon se bhi mujhe wahshat nahin rahi

zar hai kasauTi azmat-e-insan ki aaj-kal

ilm-o-hunar ki ab koi waqat nahin rahi

tahzib-e-nau ne dekhiye kya gul khilae hain

mafqud hai KHulus murawwat nahin rahi

go auraton mein jazba-e-isar KHatm hai

mardon mein bhi hamiyyat-o-ghairat nahin rahi

bazar garm rahta hai makr-o-fareb ka

sidq-o-safa ki ab koi qimat nahin rahi

hai aadmi ki zat se larzan KHud aadmi

ahl-e-jahan ke dil mein uKHuwwat nahin rahi

lahore kya chhuTa ki zamana badal gaya

arbab-e-zauq-o-shauq ki sohbat nahin rahi

kya baat hai ki ab tere sheron mein ai 'bahaar'

wo soz wo taDap wo hararat nahin rahi