afsar

zahmat-e-kaun-o-makāñ khīñch rahā hai koī

tīrgī vus.at-e-aflāk se miT jā.egī

ishq is tarah chhupā.e se bhalā kyā chhuptā

mere ashkoñ meñ koī Duub ke aaj ubhrā hai

maiñ ne dekhā hai kahīñ aaj hayā kā paikar

kis ke e.ajāz-e-karam kī yahāñ sargoshī hai

koī dīvāna sar-e-rāh sañbhal jā.egā

miT rahā thā jo use us kī ḳhabar hī kab thī

koī aa kar mirī duniyā ko badal jā.egā

kis se kah duuñ maiñ in āñkhoñ kī hasīñ baat ki ab

jāvedāñ hone ko ye sho.ala-e-dil uThtā hai

aaj to ḳhuld-e-alī-gaḌh bhī hai badnām bahut

hīr-o-rānjhā kī hikāyāt ne lab khol diye

naam ab afsar-o-anjum ke liye jaate haiñ

haañ magar kis se huī sohnī mahivāl kī jiit

kaun hai jis se mirā dard-o-ġham-e-hijr miTā

darmiyāñ aaj koī āhanī dīvār nahīñ

koī parda nahīñ ab parda-e-zulmāt se chaak

kārvān-e-ġham-e-dil aaj nahīñ ruk saktā

kahkashāñ ab mire qadmoñ kī tamannā.ī hai

aur ham toḌ chuke arsh ke pindār ko bhī

āsmāñ apnī bulandī pe kare naaz to kyā

tīrgī vus.at-e-aflāk se miT jā.egī

zahmat-e-kaun-o-makāñ khīñch rahā hai koī

zahmat-e-kaun-o-makan khinch raha hai koi

tirgi wusat-e-aflak se miT jaegi

ishq is tarah chhupae se bhala kya chhupta

mere ashkon mein koi Dub ke aaj ubhra hai

main ne dekha hai kahin aaj haya ka paikar

kis ke eajaz-e-karam ki yahan sargoshi hai

koi diwana sar-e-rah sanbhal jaega

miT raha tha jo use us ki KHabar hi kab thi

koi aa kar meri duniya ko badal jaega

kis se kah dun main in aankhon ki hasin baat ki ab

jawedan hone ko ye shoala-e-dil uThta hai

aaj to KHuld-e-ali-gaDh bhi hai badnam bahut

hir-o-ranjha ki hikayat ne lab khol diye

nam ab afsar-o-anjum ke liye jate hain

han magar kis se hui sohni mahiwal ki jit

kaun hai jis se mera dard-o-gham-e-hijr miTa

darmiyan aaj koi aahani diwar nahin

koi parda nahin ab parda-e-zulmat se chaak

karwan-e-gham-e-dil aaj nahin ruk sakta

kahkashan ab mere qadmon ki tamannai hai

aur hum toD chuke arsh ke pindar ko bhi

aasman apni bulandi pe kare naz to kya

tirgi wusat-e-aflak se miT jaegi

zahmat-e-kaun-o-makan khinch raha hai koi