afsos

magar ham ne dekhā

ki vīrān ghāTī kā dāman bharā thā

bahut saarī chīzeñ

havāoñ ke paañv se uljhī huī thiiñ

duāoñ kī

ḳhālī aur auñdhī paḌī shīshiyāñ

aur TuuTī huī panjgāna namāzeñ

navāfil-o-siyām kī saḳht Dhāleñ

masājid ke rastoñ meñ toḌī ga.ī

jūtiyoñ

aur qadm-dar-qadam

nekiyoñ kī qatāreñ

vazā.if-o-darūd-o-munājāt ke

ik ribbon meñ bañdhe

ḳhudāvand-e-ālam kī rassī ke TukḌe

aur aisī bahut saarī chīzeñ

ḳhudā kī ḳhudā.ī meñ bikhrī huī thiiñ

ki jaise yahāñ

raat Thahre hue kārvāñ ko

ab un kī zarūrat na thī

ki baḳhshish kā ḳhālī kanastar

bahut bhar gayā thā

magar nek nāmoñ kī pheñkī huī

bahut saarī chīzoñ ke

is Dher meñ

koī hamsā.e kā dard

us par bahāyā gayā garm aañsū nahīñ thā

koī bhuuk ko kāTne vaalā dildār chāqū nahīñ thā

saḳhāvat kā ḳhāmosh haath

aur shaqāvat pe uThtā huā koī baazū nahīñ thā

bahut saarī chīzeñ thiiñ

lekin kahīñ bhī tarāzū nahīñ thā

magar hum ne dekha

ki viran ghaTi ka daman bhara tha

bahut sari chizen

hawaon ke panw se uljhi hui thin

duaon ki

KHali aur aundhi paDi shishiyan

aur TuTi hui panjgana namazen

nawafil-o-siyam ki saKHt Dhaalen

masajid ke raston mein toDi gai

jutiyon

aur qadm-dar-qadam

nekiyon ki qataren

wazaif-o-darud-o-munajat ke

ek ribbon mein bandhe

KHudawand-e-alam ki rassi ke TukDe

aur aisi bahut sari chizen

KHuda ki KHudai mein bikhri hui thin

ki jaise yahan

raat Thahre hue karwan ko

ab un ki zarurat na thi

ki baKHshish ka KHali kanastar

bahut bhar gaya tha

magar nek namon ki phenki hui

bahut sari chizon ke

is Dher mein

koi hamsae ka dard

us par bahaya gaya garm aansu nahin tha

koi bhuk ko kaTne wala dildar chaqu nahin tha

saKHawat ka KHamosh hath

aur shaqawat pe uThta hua koi bazu nahin tha

bahut sari chizen thin

lekin kahin bhi taraazu nahin tha