agar aap

agar aap ek daraḳht haiñ

to zāhir hai

sab se pahle

aap ko banñā chāhiye

ek sāya-dār jagah

aur agar aap ke patte

kisī ḳhizāñ meñ gir jaa.eñ

to aap kī koshish honī chāhiye

ki bahār kā pahlā phuul

yā bārish ke ba.ad khilne vaalī pahlī koñpal

aap hī ke hisse meñ aa.e

agar aap ek daraḳht hoñ

aur koī aap ko kaaT Daale

to afsos mat kījiyegā

ho saktā hai aap kā ta.alluq

daraḳhtoñ ke us ḳhāndān se ho

jis meñ hazāroñ baras pahle

kisī nabī ne panāh lī thī

apne kaaT ke le jaa.e jaane par

afsos mat kījiyegā

ho saktā hai

aap se ek aisī kursī banā.ī jaa.e

jis par baiTh ke

koī laḌkī apne mahbūb ko

hamesha yaad kartī rahe

yā phir aap se bane ek aisī mez

jis ke sāmne koī udaas shā.er

sitāroñ bharī nazmeñ likhtā rahe

yā ho saktā hai

aap se ek aisī sīḌhī banā.ī jaa.e jise dīvār ke saath lagā ke

ham āsmān tak jā sakeñ

yā phir aap se

koī aisā pul banāyā jaa.e

jis par khaḌī ho ke

log ek dūsre se

hamesha milne ke liye

sikke pheñkā kareñ

agar aap daraḳht ban jaa.eñ

to kisī sarkārī imārat ke ahāte

yā kasī chhoTe se rāste ke darmiyān

mat ā.iyegā

varna hameñ aap ko haTāne kā bahut afsos hogā

aur aap sivā.e raakh hone ke

aur kuchh nahīñ kar sakeñge

agar aap ek daraKHt hain

to zahir hai

sab se pahle

aap ko banna chahiye

ek saya-dar jagah

aur agar aap ke patte

kisi KHizan mein gir jaen

to aap ki koshish honi chahiye

ki bahaar ka pahla phul

ya barish ke baad khilne wali pahli konpal

aap hi ke hisse mein aae

agar aap ek daraKHt hon

aur koi aap ko kaT Dale

to afsos mat kijiyega

ho sakta hai aap ka talluq

daraKHton ke us KHandan se ho

jis mein hazaron baras pahle

kisi nabi ne panah li thi

apne kaT ke le jae jaane par

afsos mat kijiyega

ho sakta hai

aap se ek aisi kursi banai jae

jis par baiTh ke

koi laDki apne mahbub ko

hamesha yaad karti rahe

ya phir aap se bane ek aisi mez

jis ke samne koi udas shaer

sitaron bhari nazmen likhta rahe

ya ho sakta hai

aap se ek aisi siDhi banai jae jise diwar ke sath laga ke

hum aasman tak ja saken

ya phir aap se

koi aisa pul banaya jae

jis par khaDi ho ke

log ek dusre se

hamesha milne ke liye

sikke phenka karen

agar aap daraKHt ban jaen

to kisi sarkari imarat ke ahate

ya kasi chhoTe se raste ke darmiyan

mat aaiyega

warna hamein aap ko haTane ka bahut afsos hoga

aur aap siwae rakh hone ke

aur kuchh nahin kar sakenge