agar main chiKHun

agar maiñ chīḳhūñ

maiñ apne dil kī tamām gahrā.iyoñ se chīḳhūñ

to kā.enātī nizām meñ kyā ḳhalal paḌegā

yahī ki

andhe kueñ se ik bāz-gasht hogī

kahegī kyuuñ tum ko kyā huā hai?

tumhī baḌe aa.e ho kahīñ ke

ye āsmān o zamīñ

ye sūraj ye chāñd taare

tamām maañ baap saare ajdād

shahr ke sab sharīf-zāde

inheñ bhī dekho

ye sab musībat-zada, matānat se

burd-bārī meñ sah rahe haiñ

tumhī meñ bardāsht kī kamī hai

agar maiñ chīḳhūñ to

merī āvāz bhī malāmat karegī mujh ko

vo sab kaheñge

ki kaun ye shor kar rahā hai

hamārī nīndeñ uchāT kar diiñ

agar maiñ chīḳhūñ

to saarā amn-o-sukūn

nazm aur nasq

mujh ko ḳhilāf-e-qanūn dushman-e-ḳhalq kah kar

salīb degā

magar ye chīḳhoñ-bharā huā dil

kisī bhī lamhe

mujhe kahīñ ḳhaufnāk rāhoñ pe Daal degā

salāh degā

ki zor se cīḳho

ki jism ke saath

ruuh bhī sard ho ga.ī phir

to kyā karoge

agar main chiKHun

main apne dil ki tamam gahraiyon se chiKHun

to kaenati nizam mein kya KHalal paDega

yahi ki

andhe kuen se ek baz-gasht hogi

kahegi kyun tum ko kya hua hai?

tumhi baDe aae ho kahin ke

ye aasman o zamin

ye suraj ye chand tare

tamam man bap sare ajdad

shahr ke sab sharif-zade

inhen bhi dekho

ye sab musibat-zada, matanat se

burd-bari mein sah rahe hain

tumhi mein bardasht ki kami hai

agar main chiKHun to

meri aawaz bhi malamat karegi mujh ko

wo sab kahenge

ki kaun ye shor kar raha hai

hamari ninden uchaT kar din

agar main chiKHun

to sara amn-o-sukun

nazm aur nasq

mujh ko KHilaf-e-qanun dushman-e-KHalq kah kar

salib dega

magar ye chiKHon-bhara hua dil

kisi bhi lamhe

mujhe kahin KHaufnak rahon pe Dal dega

salah dega

ki zor se ciKHo

ki jism ke sath

ruh bhi sard ho gai phir

to kya karoge