agar mujhe ye guman bhi ho

agar mujhe ye gumān bhī ho

ki ḳhvāb meñ maiñ na dekh pā.ūñgā

terā chehra gudāz bāñheñ udaas āñkheñ

mire laboñ ko talāsh karte hue tire lab

qasam hai mujh ko guzartī naddī ke pāniyoñ kī

maiñ apnī nīñdeñ jalā ke rakh duuñ

agar mujhe ye yaqīn bhī ho

ki sabz patte havā kī aahaT na sun sakeñge

gulāb mausam barastī bārish na sah sakegā

chamaktī shāḳhoñ pe ik shagūfa na rah sakegā

to phir bhī maiñ terā naam le kar

tarastī āñkhoñ ko band kar luuñ

ki niiñd aa.e to maiñ tire ḳhvāb dekh pā.ūñ

ye ḳhvāhisheñ haiñ ki sang-reze

jo āsmānoñ se mere dil par baras rahe haiñ

ye dhuup hai yā aziyyatoñ kā sarāb-e-dozaḳh

ye log haiñ yā ḳhalā kī vus.at meñ duur hote hue sitāre

kahāñ gayā niiñd kā parinda

paroñ se lorī sunāne vaalā

vo tere manzar dikhāne vaalā

agar mujhe ye guman bhi ho

ki KHwab mein main na dekh paunga

tera chehra gudaz banhen udas aankhen

mere labon ko talash karte hue tere lab

qasam hai mujh ko guzarti naddi ke paniyon ki

main apni ninden jala ke rakh dun

agar mujhe ye yaqin bhi ho

ki sabz patte hawa ki aahaT na sun sakenge

gulab mausam barasti barish na sah sakega

chamakti shaKHon pe ek shagufa na rah sakega

to phir bhi main tera nam le kar

tarasti aankhon ko band kar lun

ki nind aae to main tere KHwab dekh paun

ye KHwahishen hain ki sang-reze

jo aasmanon se mere dil par baras rahe hain

ye dhup hai ya aziyyaton ka sarab-e-dozaKH

ye log hain ya KHala ki wusat mein dur hote hue sitare

kahan gaya nind ka parinda

paron se lori sunane wala

wo tere manzar dikhane wala