agla safar tawil nahin

vo din bhī aa.e haiñ us kī siyāh zulfoñ meñ

kapās khilne lagī hai, jhalaktī chāñdī ke

kashīda taar chamakne lage haiñ bāloñ meñ

vo din bhī aa.e haiñ surḳh o sapīd gāloñ meñ

dhanak kā khelnā mamnu,a hai, laboñ pe faqat

guloñ kī tāzgī ik sāya-e-gurezāñ hai

vo bhī din aa.e haiñ us ke sabīh chehre par

kahīñ kahīñ koī silvaT ubhar sī aa.ī hai

zarā sī muzmahil thoḌī thakī thakī sī nazar

talāsh kartī hai umr-e-gurez pā ke nuqūsh

use bhī lagtā to hogā ki maiñ vahī huuñ, magar

ḳhizāñ-gazīda thakā sā udaas ranjīda

use bhī lagtā to hogā ki ham vahī haiñ magar

dil o dimāġh kī bāham supurdagī ke din

na jaane umr ke kis marhale pe chhūT ga.e

maiñ chāhtā huuñ kabhī baat kar ke dekhūñ to

kahūñ ki jism to ik ārizī haqīqat hai

kahūñ darūn-e-dil-o-jāñ jo ek aalam hai

vahāñ to vaqt kā ehsās tak nahīñ hotā

kahūñ ki umr se shikva, gila javānī hai

laboñ pe harf-e-shikāyat diloñ meñ talḳhī sī

aliil jazbe haiñ un se hamārā kyā rishta?

kahūñ ki aaj bhī sub.h-e-shab-e-visāl ke gul

hamārī ruuh meñ khilte haiñ, aao saath chaleñ

pakaḌ ke haath ki aglā safar tavīl nahīñ!

wo din bhi aae hain us ki siyah zulfon mein

kapas khilne lagi hai, jhalakti chandi ke

kashida tar chamakne lage hain baalon mein

wo din bhi aae hain surKH o sapid galon mein

dhanak ka khelna mamnu,a hai, labon pe faqat

gulon ki tazgi ek saya-e-gurezan hai

wo bhi din aae hain us ke sabih chehre par

kahin kahin koi silwaT ubhar si aai hai

zara si muzmahil thoDi thaki thaki si nazar

talash karti hai umr-e-gurez pa ke nuqush

use bhi lagta to hoga ki main wahi hun, magar

KHizan-gazida thaka sa udas ranjida

use bhi lagta to hoga ki hum wahi hain magar

dil o dimagh ki baham supurdagi ke din

na jaane umr ke kis marhale pe chhuT gae

main chahta hun kabhi baat kar ke dekhun to

kahun ki jism to ek aarizi haqiqat hai

kahun darun-e-dil-o-jaan jo ek aalam hai

wahan to waqt ka ehsas tak nahin hota

kahun ki umr se shikwa, gila jawani hai

labon pe harf-e-shikayat dilon mein talKHi si

alil jazbe hain un se hamara kya rishta?

kahun ki aaj bhi subh-e-shab-e-visal ke gul

hamari ruh mein khilte hain, aao sath chalen

pakaD ke hath ki agla safar tawil nahin!