agle janam mohe biTiya hi kijo

mirī biTiyā

tujhe bhī maiñ ne janmā thā usī dukh se

ki jis dukh se tire bhaa.ī ko janmā

tujhe bhī maiñ ne apne tan se vābasta rakhā

utnī hī muddat tak

ki jab tak tere bhaa.ī ko

mire tan ke har ik dukh sukh meñ tum donoñ kā hissa

ek jaisā mādar-e-fitrat ne rakhā thā

magar tū jis ghaḌī dhartī pe aa.ī

virāsat bāñTne vāloñ ne apnā faisla likhā

tujhe mujh se shikāyat hai

ki maiñ ne pyaar kī taqsīm meñ tafrīq bartī hai

khilaune aur aañsū kā jo baTvārā huā aksar

tire hisse meñ aañsū aa.e haiñ pyārī

tujhe ye jaan kar hairat to hogī

mire hisse kā aksar tar nivāla bhā.iyoñ hī ko milā kartā

magar maañ se koī kaise gila kartā

mirī jaañ rizq kī taqsīm meñ

tafrīq kā qānūn to sadiyoñ purānā hai

virāsat bāñTne vāloñ ne jo bhī faisla likhā

use ham ne bajā samjhā bajā likhā

hamārā alamiya ye hai

ki apnī raah kī dīvār ham ḳhud haiñ

ye aurat hai

ki jo aurat ke haq meñ ab bhī gūñgī hai

ye aurat hai

ki jo aurat kī ummīdoñ kī qātil hai

to kyā tārīḳh ḳhud ko yūñhī dohrātī rahegī

nahīñ aisā nahīñ hogā

ye terī jur.at-e-iz.hār ye biphrā huā lahja

yaqīñ mujh ko dilāte haiñ

tirī beTī ko ye shikva nahīñ hogā

meri biTiya

tujhe bhi main ne janma tha usi dukh se

ki jis dukh se tere bhai ko janma

tujhe bhi main ne apne tan se wabasta rakha

utni hi muddat tak

ki jab tak tere bhai ko

mere tan ke har ek dukh sukh mein tum donon ka hissa

ek jaisa madar-e-fitrat ne rakha tha

magar tu jis ghaDi dharti pe aai

wirasat banTne walon ne apna faisla likha

tujhe mujh se shikayat hai

ki main ne pyar ki taqsim mein tafriq barti hai

khilaune aur aansu ka jo baTwara hua aksar

tere hisse mein aansu aae hain pyari

tujhe ye jaan kar hairat to hogi

mere hisse ka aksar tar niwala bhaiyon hi ko mila karta

magar man se koi kaise gila karta

meri jaan rizq ki taqsim mein

tafriq ka qanun to sadiyon purana hai

wirasat banTne walon ne jo bhi faisla likha

use hum ne baja samjha baja likha

hamara alamiya ye hai

ki apni rah ki diwar hum KHud hain

ye aurat hai

ki jo aurat ke haq mein ab bhi gungi hai

ye aurat hai

ki jo aurat ki ummidon ki qatil hai

to kya tariKH KHud ko yunhi dohraati rahegi

nahin aisa nahin hoga

ye teri jurat-e-izhaar ye biphra hua lahja

yaqin mujh ko dilate hain

teri beTi ko ye shikwa nahin hoga