ahd-e-mazi

yaad hai āġhāz-e-ulfat kā zamāna yaad hai

Daal kar bāñhoñ meñ bāñheñ muskurānā yaad hai

ḳham-ba-ḳham zulfoñ kā vo chehre pe mere loTnā

bhīnī bhīnī nik.hatoñ meñ Duub jaanā yaad hai

surḳhiyoñ se vo jhalak uThnā ruḳh-e-zau-rez se

lete lete naam merā jheñp jaanā yaad hai

aage baḌh baḌh kar palaTnā aur phir ruknā mirā

is tarah dil kā machalnā tilmilānā yaad hai

vo mirī betābī-e-dil se tirī be-tābiyāñ

vo mire shikvoñ pe terā sar jhukānā yaad hai

vo mirī pazhmurdanī se terā ho jaanā udaas

vo mujhe bholī adāoñ se hañsānā yaad hai

gar kabhī ḳhalvat meñ chheḌā qissa-e-shām-e-firāq

muskurānā muskurā kar Taal jaanā yaad hai

be-jhijak milte the mujh se paas aate the mire

vo ghaḌī vo vaqt vo dilkash zamāna yaad hai

soch kar anjām-e-ulfat kuchh jhijaknā ḳhud-baḳhud

dam-ba-dam ghabrā ke mujh ko āzmānā yaad hai

vo mirā jazbāt se ghabrā ke tujh se rūThnā

ābdīda ho ke vo terā manānā yaad hai

yaad jis kī ḳhuun ke aañsū rulā.egī 'habīb'

vo hikāyat yaad hai aur vo fasāna yaad hai

yaad hai aaghaz-e-ulfat ka zamana yaad hai

Dal kar banhon mein banhen muskurana yaad hai

KHam-ba-KHam zulfon ka wo chehre pe mere loTna

bhini bhini nikhaton mein Dub jaana yaad hai

surKHiyon se wo jhalak uThna ruKH-e-zau-rez se

lete lete nam mera jhenp jaana yaad hai

aage baDh baDh kar palaTna aur phir rukna mera

is tarah dil ka machalna tilmilana yaad hai

wo meri betabi-e-dil se teri be-tabiyan

wo mere shikwon pe tera sar jhukana yaad hai

wo meri pazhmurdani se tera ho jaana udas

wo mujhe bholi adaon se hansana yaad hai

gar kabhi KHalwat mein chheDa qissa-e-sham-e-firaq

muskurana muskura kar Tal jaana yaad hai

be-jhijak milte the mujh se pas aate the mere

wo ghaDi wo waqt wo dilkash zamana yaad hai

soch kar anjam-e-ulfat kuchh jhijakna KHud-baKHud

dam-ba-dam ghabra ke mujh ko aazmana yaad hai

wo mera jazbaat se ghabra ke tujh se ruThna

aabdida ho ke wo tera manana yaad hai

yaad jis ki KHun ke aansu rulaegi 'habib'

wo hikayat yaad hai aur wo fasana yaad hai