ahd-e-mohabbat

duur mahtāb ke saa.e meñ ziyā-pāsh rahe

ruḳh-e-pur-nūr pe āvezāñ chamakte taare

chāñdnī raat meñ naddī ke kināre kākul

mere siine pe larazte hue shab-gūñ dhāre

mujhe āġhosh-e-halāvat meñ amaañ miltī thī

har madhur shaam ko majbūrī-e-ayyām se duur

apne majbūr dhaḌakte hue dil kī mānind

ġham-e-hastī se bahut duur hama kaif-o-surūr

aaj us rāhib-e-pur-nūr kī tasvīr bhī hai

apne nau-ḳhez tasavvur kī ziyā-bārī meñ

haath meñ dāna-e-sad-rang kī maalā le kar

apne irfān-o-tasavvuf kī parastārī meñ

nit-na.e zauq kī takmīl meñ gum rahtā thā

mahv thā barsoñ se vo ruuh kī bedārī meñ

zohd-o-taqvā ke fusūñ-sāz parastāroñ ne

aur aḳhlāq-o-muravvat ke riyā-kāroñ ne

apne hāthoñ se kahīñ phoḌ diyā phūñk diyā

nāznīñ husn zar-o-sīm ke ambāroñ ne

lekin us rāhib-e-pur-nūr kī azmat ke tufail

ik hasīñ ahd-e-mohabbat ke talab-gāroñ ne

apnī ma.asūm tamannāoñ ke ma.anī sīkhe

sarmadī ishq ke nākām parastāroñ ne

lākhoñ afsāne sar-e-rāh huā karte haiñ

lazzat-e-shorish-e-jazbāt se bahkā.e hue

maiñ ne har-gām pe Thukrā diye kitne hī tilism

nik.hat-o-rang ke afsūn meñ uljhā.e hue

bik ga.ī dāman-e-zarkār meñ kis va.ade par

bañdh gayā husn havas-kār kī zanjīroñ meñ

us ke aabā ke tamaddun pe nichhāvar ho kar

rah gayā ishq hasīñ ḳhvāb kī ta.abīroñ meñ

dur mahtab ke sae mein ziya-pash rahe

ruKH-e-pur-nur pe aawezan chamakte tare

chandni raat mein naddi ke kinare kakul

mere sine pe larazte hue shab-gun dhaare

mujhe aaghosh-e-halawat mein aman milti thi

har madhur sham ko majburi-e-ayyam se dur

apne majbur dhaDakte hue dil ki manind

gham-e-hasti se bahut dur hama kaif-o-surur

aaj us rahib-e-pur-nur ki taswir bhi hai

apne nau-KHez tasawwur ki ziya-bari mein

hath mein dana-e-sad-rang ki mala le kar

apne irfan-o-tasawwuf ki parastari mein

nit-nae zauq ki takmil mein gum rahta tha

mahw tha barson se wo ruh ki bedari mein

zohd-o-taqwa ke fusun-saz parastaron ne

aur aKHlaq-o-murawwat ke riya-karon ne

apne hathon se kahin phoD diya phunk diya

naznin husn zar-o-sim ke ambaron ne

lekin us rahib-e-pur-nur ki azmat ke tufail

ek hasin ahd-e-mohabbat ke talab-garon ne

apni masum tamannaon ke mani sikhe

sarmadi ishq ke nakaam parastaron ne

lakhon afsane sar-e-rah hua karte hain

lazzat-e-shorish-e-jazbaat se bahkae hue

main ne har-gam pe Thukra diye kitne hi tilism

nikhat-o-rang ke afsun mein uljhae hue

bik gai daman-e-zarkar mein kis wade par

bandh gaya husn hawas-kar ki zanjiron mein

us ke aaba ke tamaddun pe nichhawar ho kar

rah gaya ishq hasin KHwab ki tabiron mein