ai aligarh

maañ kī mamtā baap kī shafqat tirā āġhosh hai

diin duniyā kā tire saa.e meñ kis ko hosh hai

dilrubā terī adā.eñ ḳhush-nazar terā jamāl

raushnī detā hai zehnoñ ko tirā mahr-e-ḳhayāl

raqs kartī hai tire āñgan meñ jannat kī fazā

kis qadar pur-kaif hai tere daraḳhtoñ kī havā

garmiyoñ kī chāñdnī rātoñ kā manzar kaif-e-jāñ

duudh sā ThanDā samundar barf jaisī kashtiyāñ

tere dīvāne rahe haiñ kitne hī ahl-e-ḳhirad

tere zaanū par sukūñ kī niind so.e nek-o-bad

ilm kī ik sabz vaadī hai ye terī sarzamīñ

aisī hariyālī to shāyad saarī duniyā meñ nahīñ

husn kī pākīzgī tū ne atā kī umr bhar

ishq ko sanjīdgī tū ne atā kī umr bhar

har thakan ke daur meñ tū ik shajar sābit huā

gumrahī ke vāste bhī rāhbar sābit huā

man ki mamta bap ki shafqat tera aaghosh hai

din duniya ka tere sae mein kis ko hosh hai

dilruba teri adaen KHush-nazar tera jamal

raushni deta hai zehnon ko tera mahr-e-KHayal

raqs karti hai tere aangan mein jannat ki faza

kis qadar pur-kaif hai tere daraKHton ki hawa

garmiyon ki chandni raaton ka manzar kaif-e-jaan

dudh sa ThanDa samundar barf jaisi kashtiyan

tere diwane rahe hain kitne hi ahl-e-KHirad

tere zanu par sukun ki nind soe nek-o-bad

ilm ki ek sabz wadi hai ye teri sarzamin

aisi hariyali to shayad sari duniya mein nahin

husn ki pakizgi tu ne ata ki umr bhar

ishq ko sanjidgi tu ne ata ki umr bhar

har thakan ke daur mein tu ek shajar sabit hua

gumrahi ke waste bhi rahbar sabit hua