ai dil-e-be-KHabar

ai dil-e-be-ḳhabar

jo havā jā chukī ab nahīñ aa.egī

jo shajar TuuT jaatā hai phaltā nahīñ

vāpsī mausamoñ kā muqaddar to hai

jo samāñ biit jaa.e palaTtā nahīñ

jaane vaale nahīñ lauTte umr bhar

ab kise DhūñDhtā hai sar-e-rahguzar

ai dil-e-kam-nazar ai mire be-ḳhabar ai mire ham-safar

vo to ḳhushbū thā agle nagar jā chukā

chāñdnī thā huā sarf-e-rañg-e-qamar

ḳhvāb thā aañkh khulte hī ojhal huā

peḌ thā rut badalte huā be-samar

ai dil-e-be-asar ai mire chāra-gar

ye hai kis ko ḳhabar!

kab havā-e-safar kā ishāra mile!

kab khuleñ sāhiloñ par safīnoñ ke par

kaun jaane kahāñ manzil-e-mauj hai!

kis jazīre pe hai shāh-zādī kā ghar ai mire chāra-gar

ai dil-e-be-ḳhabar kam-nazar mo'tabar

tū ki muddat se hai zer-e-bār-e-safar

be-qarār-e-safar

rail kī be-hunar pTriyoñ kī tarah

aas ke be-samar mausamoñ kī tarah

be-jahat manziloñ kī masāfat meñ hai

rasta bhūle hue rahravoñ kī tarah

chob-e-nār-e-safar

e'tibār-e-nazar kis gumāñ par kareñ

ai dil-e-be-basar

ye to sāhil pe bhī dekhtī hai bhañvar

ret meñ kisht kartī hai āb-e-baqā

kholtī hai havāoñ meñ bāb-e-asar

tujh ko rakhtī hai ye zebdār-e-safar be-qarār-e-safar

ai dil-e-be-hunar

garm sāñsoñ kī vo ḳhushbueñ bhuul jā

vo chahaktī huī dhaḌkaneñ bhuul jā

bhuul jā narm hoñToñ kī shādābiyāñ

harf-e-iqrār kī lazzateñ bhuul jā

bhuul jā vo havā bhuul jā vo nagar

kaun jaane kahāñ raushnī kho ga.ī

luT gayā hai kahāñ kārvān-e-sahar

ab kahāñ gesuoñ ke vo saa.e kahāñ

us kī aahaT se chamke hue bām-o-dar ai dil-e-be-basar

rañg-e-āsūdgī ke tamāshe kahāñ

jhuTpuTā hai yahāñ rahguzar rahguzar

vo to ḳhushbū thā agle nagar jā chukā

ab kise DhūñDhtā hai are be-ḳhabar

jaane vaale nahīñ lauTte umr bhar

ai dil-e-kam-nazar ai mire chāra-gar ai mire ham-safar

ai dil-e-be-KHabar

jo hawa ja chuki ab nahin aaegi

jo shajar TuT jata hai phalta nahin

wapsi mausamon ka muqaddar to hai

jo saman bit jae palaTta nahin

jaane wale nahin lauTte umr bhar

ab kise DhunDhta hai sar-e-rahguzar

ai dil-e-kam-nazar ai mere be-KHabar ai mere ham-safar

wo to KHushbu tha agle nagar ja chuka

chandni tha hua sarf-e-rang-e-qamar

KHwab tha aankh khulte hi ojhal hua

peD tha rut badalte hua be-samar

ai dil-e-be-asar ai mere chaara-gar

ye hai kis ko KHabar!

kab hawa-e-safar ka ishaara mile!

kab khulen sahilon par safinon ke par

kaun jaane kahan manzil-e-mauj hai!

kis jazire pe hai shah-zadi ka ghar ai mere chaara-gar

ai dil-e-be-KHabar kam-nazar mo'tabar

tu ki muddat se hai zer-e-bar-e-safar

be-qarar-e-safar

rail ki be-hunar pTriyon ki tarah

aas ke be-samar mausamon ki tarah

be-jahat manzilon ki masafat mein hai

rasta bhule hue rahrawon ki tarah

chob-e-nar-e-safar

e'tibar-e-nazar kis guman par karen

ai dil-e-be-basar

ye to sahil pe bhi dekhti hai bhanwar

ret mein kisht karti hai aab-e-baqa

kholti hai hawaon mein bab-e-asar

tujh ko rakhti hai ye zebdar-e-safar be-qarar-e-safar

ai dil-e-be-hunar

garm sanson ki wo KHushbuen bhul ja

wo chahakti hui dhaDkanen bhul ja

bhul ja narm honTon ki shadabiyan

harf-e-iqrar ki lazzaten bhul ja

bhul ja wo hawa bhul ja wo nagar

kaun jaane kahan raushni kho gai

luT gaya hai kahan karwan-e-sahar

ab kahan gesuon ke wo sae kahan

us ki aahaT se chamke hue baam-o-dar ai dil-e-be-basar

rang-e-asudgi ke tamashe kahan

jhuTpuTa hai yahan rahguzar rahguzar

wo to KHushbu tha agle nagar ja chuka

ab kise DhunDhta hai are be-KHabar

jaane wale nahin lauTte umr bhar

ai dil-e-kam-nazar ai mere chaara-gar ai mere ham-safar