ai mere sare logo

ab mire dūsre baazū pe vo shamshīr hai jo

is se pahle bhī mirā nisf badan kaaT chukī

usī bandūq kī naalī hai mirī samt ki jo

is se pahle mirī shah-rag kā lahū chaaT chukī

phir vahī aag dar aa.ī hai mirī galiyoñ meñ

phir mire shahr meñ bārūd kī bū phailī hai

phir se ''tū kaun hai maiñ kaun hūñ'' aapas meñ savāl

phir vahī soch miyān-e-man-o-tū phailī hai

mirī bastī se pare bhī mire dushman hoñge

par yahāñ kab koī aġhyār kā lashkar utrā

āshnā haath hī aksar mirī jānib lapke

mere siine meñ sadā apnā hī ḳhanjar utrā

phir vahī ḳhauf kī dīvār tazabzub kī fazā

phir vahī aam huiiñ ahl-e-riyā kī bāteñ

na.ara-e-hubb-e-vatan māl-e-tijārat kī tarah

jins-e-arzāñ kī tarah dīn-e-ḳhudā kī bāteñ

is se pahle bhī to aisī hī ghaḌī aa.ī thī

sub.h-e-vahshat kī tarah shām-e-ġharībāñ kī tarah

is se pahle bhī to paimān-e-vafā TuuTe the

shīsha-e-dil kī tarah ā.īna-e-jāñ kī tarah

phir kahāñ ahmarīñ hoñToñ pe duāoñ ke diye

phir kahāñ shabnamīñ chehroñ pe rifāqat kī ridā

sandalīñ paañv se mastāna-ravī ruuTh ga.ī

marmarīñ hāthoñ pe jal-bujh gayā añgār-e-hinā

dil-nashīñ āñkhoñ meñ furqat-zada kājal royā

shāḳh-e-bāzū ke liye zulf kā bādal royā

misl-e-pairāhan-e-gul phir se badan chaak hue

jaise apnoñ kī kamānoñ meñ hoñ aġhyār ke tiir

is se pahle bhī huā chāñd mohabbat kā do-nīm

nok-e-dashna se khichī thī mirī dhartī pe lakīr

aaj aisā nahīñ aisā nahīñ hone denā

ai mire soḳhta-jāno mire piyāre logo

ab ke gar zalzale aa.e to qayāmat hogī

mere dil-gīr mire dard ke maare logo

kisī ġhāsib kisī zālim kisī qātil ke liye

ḳhud ko taqsīm na karnā mire saare logo

ab mere dusre bazu pe wo shamshir hai jo

is se pahle bhi mera nisf badan kaT chuki

usi banduq ki nali hai meri samt ki jo

is se pahle meri shah-rag ka lahu chaT chuki

phir wahi aag dar aai hai meri galiyon mein

phir mere shahr mein barud ki bu phaili hai

phir se tu kaun hai main kaun hun aapas mein sawal

phir wahi soch miyan-e-man-o-tu phaili hai

meri basti se pare bhi mere dushman honge

par yahan kab koi aghyar ka lashkar utra

aashna hath hi aksar meri jaanib lapke

mere sine mein sada apna hi KHanjar utra

phir wahi KHauf ki diwar tazabzub ki faza

phir wahi aam huin ahl-e-riya ki baaten

nara-e-hubb-e-watan mal-e-tijarat ki tarah

jins-e-arzan ki tarah din-e-KHuda ki baaten

is se pahle bhi to aisi hi ghaDi aai thi

subh-e-wahshat ki tarah sham-e-ghariban ki tarah

is se pahle bhi to paiman-e-wafa TuTe the

shisha-e-dil ki tarah aaina-e-jaan ki tarah

phir kahan ahmarin honTon pe duaon ke diye

phir kahan shabnamin chehron pe rifaqat ki rida

sandalin panw se mastana-rawi ruTh gai

marmarin hathon pe jal-bujh gaya angar-e-hina

dil-nashin aankhon mein furqat-zada kajal roya

shaKH-e-bazu ke liye zulf ka baadal roya

misl-e-pairahan-e-gul phir se badan chaak hue

jaise apnon ki kamanon mein hon aghyar ke tir

is se pahle bhi hua chand mohabbat ka do-nim

nok-e-dashna se khichi thi meri dharti pe lakir

aaj aisa nahin aisa nahin hone dena

ai mere soKHta-jaano mere piyare logo

ab ke gar zalzale aae to qayamat hogi

mere dil-gir mere dard ke mare logo

kisi ghasib kisi zalim kisi qatil ke liye

KHud ko taqsim na karna mere sare logo