اے مری ہمدم و دم ساز

اے مری ہمدم و دم ساز مری جان نفس

شورش باد مخالف سے پریشاں کیوں ہے

تیرے چہرے کی اداسی ترے لہجے کی تھکن

ایسا لگتا ہے کوئی ٹوٹ رہا ہو جیسے

کہہ رہی ہیں تری جاگی ہوئی بوجھل آنکھیں

تیرے دل پر کوئی شب خون ہوا ہو جیسے

اس قدر گردش دوراں سے ہراساں کیوں ہے

اے مری ہمدم و دم ساز مری جان نفس

عشق میں تیر ملامت تو نئی بات نہیں

اہل دل ناوک دشنام سے کب ڈرتے ہیں

جن کے دامن پہ ندامت کا کوئی داغ نہیں

وہ جفا کاریٔ الزام سے کب ڈرتے ہیں

اپنے ناکردہ گناہوں پہ پشیماں کیوں ہے

اے مری ہمدم و دم ساز مری جان نفس

یہ گرانیٔ شب ہجر کہاں تک آخر

تیرگی وقت کے سیلاب سے چھٹ جائے گی

دل پہ جو کچھ بھی گزرتی ہے گزر جانے دے

جرأت شوق سے یہ رات بھی کٹ جائے گی

عزم راسخ ہے تو اندیشۂ طوفاں کیوں ہے

اے مری ہمدم و دم ساز مری جان نفس

شورش باد مخالف سے پریشاں کیوں ہے