ai meri hamdam-o-dam-saz

ai mirī hamdam-o-dam-sāz mirī jān-e-nafas

shorish-e-bād-e-muḳhālif se pareshāñ kyoñ hai

tere chehre kī udāsī tire lahje kī thakan

aisā lagtā hai koī TuuT rahā ho jaise

kah rahī haiñ tirī jaagī huī bojhal āñkheñ

tere dil par koī shab-ḳhūn huā ho jaise

is qadar gardish-e-daurāñ se hirāsāñ kyoñ hai

ai mirī hamdam-o-dam-sāz mirī jān-e-nafas

'ishq meñ tīr-e-malāmat to na.ī baat nahīñ

ahl-e-dil nāvak-e-dushnām se kab Darte haiñ

jin ke dāman pe nadāmat kā koī daaġh nahīñ

vo jafā-kārī-e-ilzām se kab Darte haiñ

apne nā-karda gunāhoñ pe pashemāñ kyoñ hai

ai mirī hamdam-o-dam-sāz mirī jān-e-nafas

ye girānī-e-shab-e-hijr kahāñ tak āḳhir

tīrgī vaqt ke sailāb se chhaT jā.egī

dil pe jo kuchh bhī guzartī hai guzar jaane de

jur.at-e-shauq se ye raat bhī kaT jā.egī

‘azm-e-rāsiḳh hai to andesha-e-tūfāñ kyoñ hai

ai mirī hamdam-o-dam-sāz mirī jān-e-nafas

shorish-e-bād-e-muḳhālif se pareshāñ kyoñ hai

ai meri hamdam-o-dam-saz meri jaan-e-nafas

shorish-e-baad-e-muKHalif se pareshan kyon hai

tere chehre ki udasi tere lahje ki thakan

aisa lagta hai koi TuT raha ho jaise

kah rahi hain teri jagi hui bojhal aankhen

tere dil par koi shab-KHun hua ho jaise

is qadar gardish-e-dauran se hirasan kyon hai

ai meri hamdam-o-dam-saz meri jaan-e-nafas

'ishq mein tir-e-malamat to nai baat nahin

ahl-e-dil nawak-e-dushnam se kab Darte hain

jin ke daman pe nadamat ka koi dagh nahin

wo jafa-kari-e-ilzam se kab Darte hain

apne na-karda gunahon pe pasheman kyon hai

ai meri hamdam-o-dam-saz meri jaan-e-nafas

ye girani-e-shab-e-hijr kahan tak aaKHir

tirgi waqt ke sailab se chhaT jaegi

dil pe jo kuchh bhi guzarti hai guzar jaane de

jurat-e-shauq se ye raat bhi kaT jaegi

‘azm-e-rasiKH hai to andesha-e-tufan kyon hai

ai meri hamdam-o-dam-saz meri jaan-e-nafas

shorish-e-baad-e-muKHalif se pareshan kyon hai