ai sitaro

raat kī namnāk zulfoñ meñ

abhī kāzib saverā ho rahā hai

ai sitāro

kyā nahīñ mālūm tum ko

aaj maiñ aivān-e-hastī se nikal kar

ḳhvāb-zār-e-zindagī meñ muntashir huuñ

niiñd kī bād-e-sabā āñkhoñ se haT kar bah rahī hai

mere andar ruuh jū-e-kahkashāñ hai

jis se merī hastī-e-zāhir hai tābāñ

hastī-e-bātin ke raushan āsmāñ par

muttaqī anvār meñ Duube hue hassās jugnū

vādī-e-asrār kī jānib ravāñ haiñ

ai sitāro

raat ke sāgar ko maiñ

apne qalam meñ bhar chukā huuñ

ḳhvāb kī bojhal karāheñ

be-karāñ ehsās ke

jal-thal kaToroñ se chhalaktī jā rahī haiñ

saf.ha-e-qirtās par ab

āsmāñ kī be-navā tanhā.iyāñ

manzūm hoñgī

sub.h tak merā qalam ristā rahegā

raat ki namnak zulfon mein

abhi kazib sawera ho raha hai

ai sitaro

kya nahin malum tum ko

aaj main aiwan-e-hasti se nikal kar

KHwab-zar-e-zindagi mein muntashir hun

nind ki baad-e-saba aankhon se haT kar bah rahi hai

mere andar ruh ju-e-kahkashan hai

jis se meri hasti-e-zahir hai taban

hasti-e-baatin ke raushan aasman par

muttaqi anwar mein Dube hue hassas jugnu

wadi-e-asrar ki jaanib rawan hain

ai sitaro

raat ke sagar ko main

apne qalam mein bhar chuka hun

KHwab ki bojhal karahen

be-karan ehsas ke

jal-thal kaToron se chhalakti ja rahi hain

safha-e-qirtas par ab

aasman ki be-nawa tanhaiyan

manzum hongi

subh tak mera qalam rista rahega