ai urus-e-bambai

ai urūs-e-bamba.ī sad-haif pīroñ kā shikār

qāfile pīroñ ke baiThe haiñ qatār-andar-qatār

har galī kī moḌ par ik piir hai baiThā huā

pūchhtā hai jis se har ik zindagī kā rāsta

masjidoñ meñ but-kadoñ meñ aur mai-ḳhānoñ meñ piir

koh meñ gulzār meñ bastī meñ vīrānoñ meñ piir

jis taraf nazreñ uThīñ pīroñ kā ik sailāb hai

saikḌoñ pīroñ ke andar aadmī nāyāb hai

bamba.ī meñ ġham-gusār-e-zindagī miltā nahīñ

piir to milte haiñ lekin aadmī miltā nahīñ

piir vo jo race ke ghoḌoñ pe rakhte haiñ nazar

vahī nāzil hotī hai saTTe kī jin ke qalb par

ahmaqoñ ko aur bhī ullū banāne ke liye

aa.e haiñ duniyā meñ jo saTTā batāne ke liye

aap kī tauhīn hai gar kuchh bhī mehnat kījiye

ek biiḌī dījiye saTTe kā number lījiye

paar hai beḌā jo kar le koī pīroñ par yaqīñ

naukrī aulād paise kā koī dānda nahīñ

hoshiyār in rahzanoñ se ai urūs-e-bamba.ī

tere ruḳhsāroñ kī kam hone lagī hai raushnī

terī nasloñ meñ javāñ pīroñ kī bāteñ jā.eñgī

aql ke hote hue bhī rañg apnā lā.eñgī

zindagī kā rāsta is tarah mil saktā nahīñ

ġhuncha-e-ummīd in pīroñ se khil saktā nahīñ

chhoḌ de lillāh ab ye pīr-bāzī chhoḌ de

but-shikan fitrat hai terī in butoñ ko toḌ de

haif tujh ko zindagī kā rāsta miltā nahīñ

piir milte haiñ tujhe lekin ḳhudā miltā nahīñ

ai urus-e-bambai sad-haif piron ka shikar

qafile piron ke baiThe hain qatar-andar-qatar

har gali ki moD par ek pir hai baiTha hua

puchhta hai jis se har ek zindagi ka rasta

masjidon mein but-kadon mein aur mai-KHanon mein pir

koh mein gulzar mein basti mein viranon mein pir

jis taraf nazren uThin piron ka ek sailab hai

saikDon piron ke andar aadmi nayab hai

bambai mein gham-gusar-e-zindagi milta nahin

pir to milte hain lekin aadmi milta nahin

pir wo jo race ke ghoDon pe rakhte hain nazar

wahi nazil hoti hai saTTe ki jin ke qalb par

ahmaqon ko aur bhi ullu banane ke liye

aae hain duniya mein jo saTTa batane ke liye

aap ki tauhin hai gar kuchh bhi mehnat kijiye

ek biDi dijiye saTTe ka number lijiye

par hai beDa jo kar le koi piron par yaqin

naukri aulad paise ka koi danda nahin

hoshiyar in rahzanon se ai urus-e-bambai

tere ruKHsaron ki kam hone lagi hai raushni

teri naslon mein jawan piron ki baaten jaengi

aql ke hote hue bhi rang apna laengi

zindagi ka rasta is tarah mil sakta nahin

ghuncha-e-ummid in piron se khil sakta nahin

chhoD de lillah ab ye pir-bazi chhoD de

but-shikan fitrat hai teri in buton ko toD de

haif tujh ko zindagi ka rasta milta nahin

pir milte hain tujhe lekin KHuda milta nahin