ai zamistan ki hawa tez na chal

ai zamistāñ kī huā tez na chal

is qadar tez na ho mauj-e-subuk-ḳhez kī rau

kahīñ ashjār ke ḳhemoñ kī tanābeñ kaT jaa.eñ

zard patte haiñ abhī gulshan-e-hastī kā siñghār

kah rahī hai ye abhī ahd-e-guzashta kī bahār

rañg-rafta huuñ magar aaj bhī tasvīr meñ huuñ

murtasim haiñ mirī shāḳhoñ pe mirī yaad ke chāñd

maiñ hanūz apne ḳhayālāt kī zanjīr meñ huuñ

abhī pattoñ pe chamak uThtā hai rañgoñ kā ġhubār

abhī shāḳhoñ meñ lahak jaatī hai bulbul kī pukār

barg-rīzāñ se kaho shahar se bāhar Thahre

shahar ke baaġh se bustān-e-dabistāñ se pare

barg-e-larzāñ meñ taḌaptā hai abhī zauq-e-numū

par-e-tā.ūs meñ hai raqs kī ḳhvāhish ab bhī

abhī kartā hai chaman chāk-e-garebāñ ko rafū

yuuñ to qānūn haiñ fitrat ke aTal

ai zamistāñ kī havā tez na chal

sa.ī-e-malbūs meñ haiñ kitne nagoñ baḳht-e-zabūñ

zindagī jin ke liye sahn-e-saman-posh nahīñ

duur ke des se aa.ī huī utran ke liye

mard-o-zan kūcha-o-bāzār meñ rusvā haiñ abhī

jaise ho qahr-e-mujassam tirī yaḳh-basta jabīñ

terī aahaT meñ ho jaise kisī dahshat kā payām

terī dastak se larazte haiñ makāñ aur makīñ

vo makāñ jin ke dar-o-bām dar-o-bām nahīñ

vo makīñ jin ke liye ishrat-e-ayyām nahīñ

jin ke lahjoñ meñ nahīñ lazzat-e-guftār kā rañg

jin kī āvāz meñ haiñ tīra-nasībī ke azaab

jin se tahzīb liyā kartī hai jiine kā ḳhirāj

jin kī har saañs hai andesha-e-fardā kā nisāb

is qadar tund na ho dekh sambhal

ai zamistāñ kī huā tez na chal

ai zamistan ki hua tez na chal

is qadar tez na ho mauj-e-subuk-KHez ki rau

kahin ashjar ke KHemon ki tanaben kaT jaen

zard patte hain abhi gulshan-e-hasti ka singhaar

kah rahi hai ye abhi ahd-e-guzashta ki bahaar

rang-rafta hun magar aaj bhi taswir mein hun

murtasim hain meri shaKHon pe meri yaad ke chand

main hanuz apne KHayalat ki zanjir mein hun

abhi patton pe chamak uThta hai rangon ka ghubar

abhi shaKHon mein lahak jati hai bulbul ki pukar

barg-rizan se kaho shahar se bahar Thahre

shahar ke bagh se bustan-e-dabistan se pare

barg-e-larzan mein taDapta hai abhi zauq-e-numu

par-e-taus mein hai raqs ki KHwahish ab bhi

abhi karta hai chaman chaak-e-gareban ko rafu

yun to qanun hain fitrat ke aTal

ai zamistan ki hawa tez na chal

sai-e-malbus mein hain kitne nagon baKHt-e-zabun

zindagi jin ke liye sahn-e-saman-posh nahin

dur ke des se aai hui utran ke liye

mard-o-zan kucha-o-bazar mein ruswa hain abhi

jaise ho qahr-e-mujassam teri yaKH-basta jabin

teri aahaT mein ho jaise kisi dahshat ka payam

teri dastak se larazte hain makan aur makin

wo makan jin ke dar-o-baam dar-o-baam nahin

wo makin jin ke liye ishrat-e-ayyam nahin

jin ke lahjon mein nahin lazzat-e-guftar ka rang

jin ki aawaz mein hain tira-nasibi ke azab

jin se tahzib liya karti hai jine ka KHiraj

jin ki har sans hai andesha-e-farda ka nisab

is qadar tund na ho dekh sambhal

ai zamistan ki hua tez na chal