ai zohra-jabin nach

ai zohra-jabīñ naach mirī zohra-jabīñ naach

lenin kī qasam aaj tū dīvāna banā de

haañ merī nigāhoñ se nigāhoñ ko milā kar

resham se ye gesū mire shānoñ pe bichhā de

le dekh ki laayā huuñ na.ī qism ke bunde

kal reshmī saarī bhī tirī nazr karūñgā

biivī mirī bīmār hai achchhā hai ki mar jaa.e

ab maiñ tirī zulfoñ hī ke saa.e meñ jiyūñgā

haañ jaam uThā jaam ki kartā hai ishāre

ye abr ye bal khātī phuvāroñ kā tarannum

kis naaz se rah rah ke chamaktī hai ye bijlī

jaise tire tarshe hue hoñToñ pe tabassum

ye tere madhur giit ye paa.el kī chhamā-chham

hai in kī badaulat hī mirī garmī-e-afkār

ye seb se ruḳhsār ye bādām sī āñkheñ

paate haiñ tavānā.ī inhīñ se mire ash'ār

ye terā ḳham-o-pech tire raqs ke andāz

jaise kisī muflis ke taḌapne kī ho tasvīr

lenin kī qasam ye tire gesū-e-pareshāñ

jaise kisī mazdūr kī uljhī huī taqdīr

kam-zarf haiñ dete haiñ tavā.if ke jo tā’ne

ai zohra-jabīñ asl meñ mazdūr hai tū bhī

laa.e jo tire paas khanakte hue sikke

ḳhidmat ko har us shaḳhs ke majbūr hai tū bhī

ġhurbat ke ghaTā-Top añdhere meñ mirī jaañ

maiñ surḳh savere kī damak dekh rahā huuñ

mumkin hai ki mil jaa.e mujhe bhī koī ‘ohda

ummīd kī halkī sī chamak dekh rahā huuñ

mazdūroñ ke jalse meñ sunānī hai mujhe aaj

vo nazm mamūle ko jo shāhīñ se laḌā de

stalin-o-lenin kī qasam jaam kī saugand

ai zohra-jabīñ pighlī huī aag pilā de

mahkī huī sāñseñ mirī sāñsoñ meñ samo de

sahbā-e-shafaq-rang kī mastī meñ Dubo de

ai zohra-jabin nach meri zohra-jabin nach

lenin ki qasam aaj tu diwana bana de

han meri nigahon se nigahon ko mila kar

resham se ye gesu mere shanon pe bichha de

le dekh ki laya hun nai qism ke bunde

kal reshmi sari bhi teri nazr karunga

biwi meri bimar hai achchha hai ki mar jae

ab main teri zulfon hi ke sae mein jiyunga

han jam uTha jam ki karta hai ishaare

ye abr ye bal khati phuwaron ka tarannum

kis naz se rah rah ke chamakti hai ye bijli

jaise tere tarshe hue honTon pe tabassum

ye tere madhur git ye pael ki chhama-chham

hai in ki badaulat hi meri garmi-e-afkar

ye seb se ruKHsar ye baadam si aankhen

pate hain tawanai inhin se mere ash'ar

ye tera KHam-o-pech tere raqs ke andaz

jaise kisi muflis ke taDapne ki ho taswir

lenin ki qasam ye tere gesu-e-pareshan

jaise kisi mazdur ki uljhi hui taqdir

kam-zarf hain dete hain tawaif ke jo ta’ne

ai zohra-jabin asl mein mazdur hai tu bhi

lae jo tere pas khanakte hue sikke

KHidmat ko har us shaKHs ke majbur hai tu bhi

ghurbat ke ghaTa-Top andhere mein meri jaan

main surKH sawere ki damak dekh raha hun

mumkin hai ki mil jae mujhe bhi koi ‘ohda

ummid ki halki si chamak dekh raha hun

mazduron ke jalse mein sunani hai mujhe aaj

wo nazm mamule ko jo shahin se laDa de

stalin-o-lenin ki qasam jam ki saugand

ai zohra-jabin pighli hui aag pila de

mahki hui sansen meri sanson mein samo de

sahba-e-shafaq-rang ki masti mein Dubo de