ain-ul-yaqin

maiñ ne dukh nahīñ dekhā

maiñ ne kuchh nahīñ dekhā

maiñ ne sukh nahīñ dekhā

maiñ ne kuchh nahīñ dekhā

duniyā merī hathelī se bāhar kyā rahī hogī maiñ ne dekhā

zamīn par shāyad sailāb aayā thā

maiñ ne dekhā ki dhuup chauñkī

aur bhaag kar daraḳhtoñ kī choTiyoñ par chaḌh ga.ī us kā rañg faq thā

aur us kī umr terah baras se ziyāda na thī

sailāb ne us ke paañv chhū liye use phir bhī yaqīn nahīñ aayā

jaise kah rahī ho

jaao mujhe apne yaqīnī par kabhī yaqīn nahīñ aayā

be-īmān aadmī kī tarah

maiñ be-yaqīn huuñ

ye log kahānī sunāte sunāte ruk jaate haiñ

aur ḳhāmoshī ko sunāte sunāte ruk jaate haiñ

jaise tīr-e-ārzū havā aur parinda chhide hue tirchhe zāviye banā kar

zan se guzar ga.e hoñ

aur jaise un sab ko ek nazar meñ sab ne dekh liyā ho

jin samundaroñ par ye parinde gireñge

vahāñ bahut shor hogā

aur log kahāniyoñ ko amānat kar ke dariyā meñ bahā dete hoñge

ye log tambākū ke pattoñ meñ apne dil lapeT kar bo dete hoñge

raat nahā.ī huī kabūtarī kī tarah merī khiḌkī meñ aa baiThtī hai

aur dete se bāteñ karne lagtī hai

maiñ munāfiqat ko chiir kar paar nikal jaanā chāhtī huuñ

raat jo maqtūloñ ke ḳhuun ko siyāh aur sard kar detī hai

aur qātiloñ ko panāh detī hai

raat jo qātiloñ ko panāh detī hai ki vo apne haath dho leñ

din jo salāmtī par la.anat bhejtā hai tulūa hotā hai

aur rañge hue hāthoñ ko pakaḌ letā hai

aur un ke chehroñ ko nañgā kar detā hai jin kī āñkhoñ meñ

marne vāloñ kī shabīheñ jam ga.iiñ hotī haiñ

taaki hone vaale maqtūl un kā badla le sakeñ

din jo raat ko chaak kar ke tulūa hotā hai

sar-e-ām unheñ phāñsī kā elaan kartā hai

sar-e-ām apnī sazā kā elaan suntā hai

din jis ko bachchoñ ne libās kiyā

aur sūraj khel ga.e

main ne dukh nahin dekha

main ne kuchh nahin dekha

main ne sukh nahin dekha

main ne kuchh nahin dekha

duniya meri hatheli se bahar kya rahi hogi main ne dekha

zamin par shayad sailab aaya tha

main ne dekha ki dhup chaunki

aur bhag kar daraKHton ki choTiyon par chaDh gai us ka rang faq tha

aur us ki umr terah baras se ziyaada na thi

sailab ne us ke panw chhu liye use phir bhi yaqin nahin aaya

jaise kah rahi ho

jao mujhe apne yaqini par kabhi yaqin nahin aaya

be-iman aadmi ki tarah

main be-yaqin hun

ye log kahani sunate sunate ruk jate hain

aur KHamoshi ko sunate sunate ruk jate hain

jaise tir-e-arzu hawa aur parinda chhide hue tirchhe zawiye bana kar

zan se guzar gae hon

aur jaise un sab ko ek nazar mein sab ne dekh liya ho

jin samundaron par ye parinde girenge

wahan bahut shor hoga

aur log kahaniyon ko amanat kar ke dariya mein baha dete honge

ye log tambaku ke patton mein apne dil lapeT kar bo dete honge

raat nahai hui kabutari ki tarah meri khiDki mein aa baiThti hai

aur dete se baaten karne lagti hai

main munafiqat ko chir kar par nikal jaana chahti hun

raat jo maqtulon ke KHun ko siyah aur sard kar deti hai

aur qatilon ko panah deti hai

raat jo qatilon ko panah deti hai ki wo apne hath dho len

din jo salamti par lanat bhejta hai tulua hota hai

aur range hue hathon ko pakaD leta hai

aur un ke chehron ko nanga kar deta hai jin ki aankhon mein

marne walon ki shabihen jam gain hoti hain

taki hone wale maqtul un ka badla le saken

din jo raat ko chaak kar ke tulua hota hai

sar-e-am unhen phansi ka elan karta hai

sar-e-am apni saza ka elan sunta hai

din jis ko bachchon ne libas kiya

aur suraj khel gae