ajab hai khel carrom ka

safed aur siyāh goToñ ke hasīñ ik dā.ere andar

bahut hī surḳh rañgat kī hasīñ ik goT hotī hai

ki jis ko raanī kahte haiñ

har ik khelne vaale kī bas ik hī tamannā hai

isī carrom ke konoñ meñ jo chhoTe chhoTe kamre haiñ

unheñ ābād karnā hai kanīzoñ se aur raanī se

khilāḌī chaal chaltā hai stricker kī madad se

āmad-o-raft un kanīzoñ kī

lagī rahtī hai kamroñ meñ

kahīñ gorī kahīñ kaalī kabhī raanī

ajab hai khel carrom kā

har ik yaañ khelne vaalā isī dhun meñ hai sargardāñ

isī kāvish meñ rahtā hai

kisī tarah se raanī ko vo us jānib ko le jaa.e

jo us kī jiit kā ghar hai hai maskan us kī fat.h kā

mahal jo hai tamannā kā jo us kī rājdhānī hai

jahāñ pe jā ke ye raanī usī kī ho ke rah jaa.e

ajab hai khel carrom kā

udhar raanī kī sharteñ haiñ karegā jo bhī puurī ye

to raanī tab hī jā.egī

lo us kī shart bhī sun lo ki

kanīz-e-ḳhās ko le kar hī raanī aap kī hogī

karegī kamre kā ruḳh jab kanīz-e-ḳhās hamrāh ho

siyāh ho chāhe gorī ho magar vo saath meñ jaa.e

ajab hai khel carrom kā

mujhe raanī kī shartoñ par baḌā hī pyaar aayā hai

khilāḌī to nahīñ raanī magar raanī to hai āḳhir

humā fat.h-o-nusrat kā

aur akasr kāmrānī kā

usī ke sar pe jaatā hai

ki jis ke paas raanī hai

ka.ī tarah se dekho to

bahut haiñ zāviye us meñ

bahut asbāq haiñ us meñ

darīche zehn ke khole

ajab hai khel carrom kā

kabhī raanī ke hote bhī

shikast-e-fāsh hotī hai

kabhī raanī ke hone se

muqaddar jagmagā uTThe

muzaffar aap ko kar de

kabhī raanī to miltī hai magar

tum haar jaate ho

kabhī aisā bhī hotā hai

koī raanī ko na pā kar

bhī tum se jiit jaatā hai

ajab hai khel carrom kā

safed aur siyah goTon ke hasin ek daere andar

bahut hi surKH rangat ki hasin ek goT hoti hai

ki jis ko rani kahte hain

har ek khelne wale ki bas ek hi tamanna hai

isi carrom ke konon mein jo chhoTe chhoTe kamre hain

unhen aabaad karna hai kanizon se aur rani se

khilaDi chaal chalta hai stricker ki madad se

aamad-o-raft un kanizon ki

lagi rahti hai kamron mein

kahin gori kahin kali kabhi rani

ajab hai khel carrom ka

har ek yan khelne wala isi dhun mein hai sargardan

isi kawish mein rahta hai

kisi tarah se rani ko wo us jaanib ko le jae

jo us ki jit ka ghar hai hai maskan us ki fath ka

mahal jo hai tamanna ka jo us ki rajdhani hai

jahan pe ja ke ye rani usi ki ho ke rah jae

ajab hai khel carrom ka

udhar rani ki sharten hain karega jo bhi puri ye

to rani tab hi jaegi

lo us ki shart bhi sun lo ki

kaniz-e-KHas ko le kar hi rani aap ki hogi

karegi kamre ka ruKH jab kaniz-e-KHas hamrah ho

siyah ho chahe gori ho magar wo sath mein jae

ajab hai khel carrom ka

mujhe rani ki sharton par baDa hi pyar aaya hai

khilaDi to nahin rani magar rani to hai aaKHir

huma fath-o-nusrat ka

aur akasr kaamrani ka

usi ke sar pe jata hai

ki jis ke pas rani hai

kai tarah se dekho to

bahut hain zawiye us mein

bahut asbaq hain us mein

dariche zehn ke khole

ajab hai khel carrom ka

kabhi rani ke hote bhi

shikast-e-fash hoti hai

kabhi rani ke hone se

muqaddar jagmaga uTThe

muzaffar aap ko kar de

kabhi rani to milti hai magar

tum haar jate ho

kabhi aisa bhi hota hai

koi rani ko na pa kar

bhi tum se jit jata hai

ajab hai khel carrom ka