ajab lahja hai us ka

pāniyoñ par jhilmilātī chāñdnī jaisā

mire dil kā samundar jab bhañvar kī zad meñ aa jaa.e

sabhī tārīk lahreñ gher kar mujh ko

kisī pātāl kā rasta dikhātī hoñ

to vo aisī sifat lahja

mujhe phir sāhiloñ par khīñch laatā hai

mujhe kahtā hai dekho

is bhañvar ke paar bhī duniyā meñ kuchh lamhe dhaḌakte haiñ

unheñ bhī apnī sāñsoñ meñ parda dekhūñ

ye lahreñ jo ki añdhiyāroñ meñ dev-āsār lagtī haiñ

unheñ tum chāñdnī meñ dekhnā ye kis tarah

kirnoñ se mil kar mājare taḳhlīq kartī haiñ

ye lahreñ jab rupahle nuur kī naddī meñ Dhaltī haiñ

to mastī meñ machaltī āsmānoñ ko lapaktī haiñ

amāvas jab bhī aa.e chāñdnī ko yā magar lenā

mire chāroñ taraf meloñ pe chaltī dhuup phailī hai

magar us kī ye bāteñ bārishoñ kī būñdiyoñ jaisī

mire dil kī darāḌoñ meñ

harī faslī ugaa.ī haiñ

maiñ sar se paañv tak

shabnam se bhīgī pattiyoñ meñ Duub jaatī huuñ

paniyon par jhilmilati chandni jaisa

mere dil ka samundar jab bhanwar ki zad mein aa jae

sabhi tarik lahren gher kar mujh ko

kisi patal ka rasta dikhati hon

to wo aisi sifat lahja

mujhe phir sahilon par khinch lata hai

mujhe kahta hai dekho

is bhanwar ke par bhi duniya mein kuchh lamhe dhaDakte hain

unhen bhi apni sanson mein parda dekhun

ye lahren jo ki andhiyaron mein dew-asar lagti hain

unhen tum chandni mein dekhna ye kis tarah

kirnon se mil kar majare taKHliq karti hain

ye lahren jab rupahle nur ki naddi mein Dhalti hain

to masti mein machalti aasmanon ko lapakti hain

amawas jab bhi aae chandni ko ya magar lena

mere chaaron taraf melon pe chalti dhup phaili hai

magar us ki ye baaten barishon ki bundiyon jaisi

mere dil ki daraDon mein

hari fasli ugai hain

main sar se panw tak

shabnam se bhigi pattiyon mein Dub jati hun