ajanmi beTi

tū ne aane na diyā duniyā meñ

maiñ tire jism kā hī hissa thī

is tarah kyuuñ miTā diyā mujh ko

maiñ mohabbat kā tere qissa thī

mujh ko hissoñ meñ baañT Daalā thā

kitne TukḌoñ meñ kaaT Daalā thā

mere hone se hotā kyā nuqsān

noch lī kyuuñ ye tum ne nannhī jaan

mere hone se kyā kamī hotī

maiñ tire ghar kī laxmī hotī

kuchh muqaddar nahīñ thā kyā merā

kyā mujhe haq nahīñ thā jiine kā

baañT letī maiñ terī har mushkil

terī āsān zindagī hotī

haath bantī kabhī maiñ paañv tire

maiñ tire ghar kī raushnī hotī

bojh kyuuñ beTiyāñ samajhte haiñ

haa.e ye duniyā vaale kaise haiñ

beTiyāñ hī lageñgī jab bhārī

ḳhatm phir kā.enāt hai saarī

tu ne aane na diya duniya mein

main tere jism ka hi hissa thi

is tarah kyun miTa diya mujh ko

main mohabbat ka tere qissa thi

mujh ko hisson mein banT Dala tha

kitne TukDon mein kaT Dala tha

mere hone se hota kya nuqsan

noch li kyun ye tum ne nannhi jaan

mere hone se kya kami hoti

main tere ghar ki laxmi hoti

kuchh muqaddar nahin tha kya mera

kya mujhe haq nahin tha jine ka

banT leti main teri har mushkil

teri aasan zindagi hoti

hath banti kabhi main panw tere

main tere ghar ki raushni hoti

bojh kyun beTiyan samajhte hain

hae ye duniya wale kaise hain

beTiyan hi lagengi jab bhaari

KHatm phir kaenat hai sari