ajib KHwahish

maiñ chāhtā huuñ

ki merā beTā

javān ho kar

kisī hasīna kī kakuloñ kā asiir Thahre

mirī duā hai

ki ye rivāyat na TuuT jaa.e

use bhī kuchh dil kī rahnumā.ī meñ

zindagī ko guzārne kā sharaf atā ho

machine us ko bhī ban hī jaanā hai āḳhirash

bas duā yahī hai

ki mantiqoñ aur maslahat kī

napī-tulī zindagī se pahle

vo jī ke dekhe ḳhud apnī ḳhātir

kisī kī ḳhātir

vo apnā aapā bhulā ke dekhe

jo us ko mohtāt ban hī jaanā hai

apnī nīndoñ ke zimn meñ bhī

to chāhtā huuñ

vo chand rāteñ to ThanDī aahoñ ke saath kaaTe

aur is se pahle

ki chāñd sūraj faqat zarūrat kī chiiz Thahreñ

vo nañge pairoñ sulagtī chhat par

khaḌā rahe ik jhalak kī ḳhātir

vo chāñdnī shab meñ muntazir ho kisī parī kā

ḳhurāk kī ahmiyat kā qaa.el to ho rahegā

maiñ chāhtā huuñ

vo bhuuk ke zā.iqe se bhī

āshnā agar ho

to kyā burā hai

main chahta hun

ki mera beTa

jawan ho kar

kisi hasina ki kakulon ka asir Thahre

meri dua hai

ki ye riwayat na TuT jae

use bhi kuchh dil ki rahnumai mein

zindagi ko guzarne ka sharaf ata ho

machine us ko bhi ban hi jaana hai aaKHirash

bas dua yahi hai

ki mantiqon aur maslahat ki

napi-tuli zindagi se pahle

wo ji ke dekhe KHud apni KHatir

kisi ki KHatir

wo apna aapa bhula ke dekhe

jo us ko mohtat ban hi jaana hai

apni nindon ke zimn mein bhi

to chahta hun

wo chand raaten to ThanDi aahon ke sath kaTe

aur is se pahle

ki chand suraj faqat zarurat ki chiz Thahren

wo nange pairon sulagti chhat par

khaDa rahe ek jhalak ki KHatir

wo chandni shab mein muntazir ho kisi pari ka

KHurak ki ahmiyat ka qael to ho rahega

main chahta hun

wo bhuk ke zaiqe se bhi

aashna agar ho

to kya bura hai