ajib log

ajiib log haiñ

sahrā meñ shahr meñ ghar meñ

sulagtī ret pe ThiThure hue samundar meñ

ḳhalā meñ chāñd kī banjar zamīñ ke siine par

jo sub.h o shaam kī be-rabt raah meñ chup-chāp

ta.alluqāt kī tāmīr karte rahte haiñ

havā ke dosh pe tūfān zalzala sailāb

diyā-salā.ī kī tiilī pe tank atom bam

koī julūs koī poster koī taqrīr

umaDtī bhiiḌ kā har vote koī ballot box

phisaltī kursī kā jaadū basoñ kī lambī queue,

kahīñ pe sehn meñ gobar kahīñ pe gaa.e kā sar

har ek gosha hai shamshān qabr hai bistar

akelā phirtā hai sunsān shahr meñ curfew

qarīb ghuur pe chiThḌoñ meñ jism ke TukḌe

mahaktī raat se janmī huī fasurda-sub.h

bigaḌte bante hue zāviye khisaktī iiñT

tamām silsile be-rabt munqate rishte

magar vo dauḌte pairoñ pe uThte baḌhte haath

har ek jabr se be-ḳhauf be-niyāzāna

jo sub.h o shaam kī be-rabt raah meñ chup-chāp

ta.alluqāt kī tāmīr karte rahte haiñ

ajiib log haiñ

ajib log hain

sahra mein shahr mein ghar mein

sulagti ret pe ThiThure hue samundar mein

KHala mein chand ki banjar zamin ke sine par

jo subh o sham ki be-rabt rah mein chup-chap

talluqat ki tamir karte rahte hain

hawa ke dosh pe tufan zalzala sailab

diya-salai ki tili pe tank atom bam

koi julus koi poster koi taqrir

umaDti bhiD ka har wote koi ballot box

phisalti kursi ka jadu bason ki lambi queue,

kahin pe sehn mein gobar kahin pe gae ka sar

har ek gosha hai shamshan qabr hai bistar

akela phirta hai sunsan shahr mein curfew

qarib ghur pe chiThDon mein jism ke TukDe

mahakti raat se janmi hui fasurda-subh

bigaDte bante hue zawiye khisakti inT

tamam silsile be-rabt munqate rishte

magar wo dauDte pairon pe uThte baDhte hath

har ek jabr se be-KHauf be-niyazana

jo subh o sham ki be-rabt rah mein chup-chap

talluqat ki tamir karte rahte hain

ajib log hain