ajnabi shahr

ajnabī shahr nāzāñ na ho

ham ġharīb-ul-vatan tere dāman meñ aa.e to haiñ

tujh ko beche to haiñ apne ilm-o-hunar sanadeñ

ham ko iqrār hai

terī raunaq se kab ham ko inkār hai

jaane kyoñ

har qadam par ye ehsās hai

ik na.ī car bankoñ ke qarze kyā yahī apnī mīrās hai

apnī tahzīb maz.hab zabāñ

haath meñ ḳhālī kashkol thāme

saath chalte haiñ kyoñ

ik ḳhalish dil meñ rahtī hai kyoñ

ki ye dollar hamārā ḳhudā to nahīñ

ajnabī shahr kaise batā.eñ

tere dāman kī rangīniyāñ dekh kar

yaad aate haiñ kyoñ apne vo ham-vatan

jin ke chehre dhuāñ

jism lāġhar

ḳhamīda kamar

zindagī rā.egāñ

ajnabī shahr ab kyā batā.eñ

ham ne kyoñ chhoḌ dī

apne āñgan kī 'usrat-zada āfiyat

apne ghar apne mausam apne naġhmoñ kī mastī

kis ko ilzām deñ

ḳhud ko

hālāt ko

zindagī kī na.ī tez raftār ko

yā ki un kargasoñ ko jo siyāsat kī gaddī pe haiñ jalva-gar

ajnabi shahr nazan na ho

hum gharib-ul-watan tere daman mein aae to hain

tujh ko beche to hain apne ilm-o-hunar sanaden

hum ko iqrar hai

teri raunaq se kab hum ko inkar hai

jaane kyon

har qadam par ye ehsas hai

ek nai car bankon ke qarze kya yahi apni miras hai

apni tahzib mazhab zaban

hath mein KHali kashkol thame

sath chalte hain kyon

ek KHalish dil mein rahti hai kyon

ki ye dollar hamara KHuda to nahin

ajnabi shahr kaise bataen

tere daman ki ranginiyan dekh kar

yaad aate hain kyon apne wo ham-watan

jin ke chehre dhuan

jism laghar

KHamida kamar

zindagi raegan

ajnabi shahr ab kya bataen

hum ne kyon chhoD di

apne aangan ki 'usrat-zada aafiyat

apne ghar apne mausam apne naghmon ki masti

kis ko ilzam den

KHud ko

haalat ko

zindagi ki nai tez raftar ko

ya ki un kargason ko jo siyasat ki gaddi pe hain jalwa-gar