اجنبی

وہ اجنبی تھا

مرے نگر میں

ایک ایسی منزل کا راہرو

جو فقط تمنا تھی روشنی تھی

میں کس سے پوچھوں

کہاں ہے وہ اجنبی مسافر

جو پیار کی دھوپ لے کے آیا

اور اب گیا ہے

تو ہنستا ہنستا

یہ شہر سنسان کر گیا ہے

میں کیسے مانوں

کہ جانے والے کو

حادثے کی خبر نہیں ہے

جو شہر دل پر گزر گیا ہے

میں کیسے جانوں

کہ دور جا کر

اداس ہے خوش ہے جاگتا ہے

کہ سو رہا ہے

کبھی مجھے بھی وہ سوچتا ہے

میں کس سے پوچھوں

کہ میں یہاں

خود بھی اجنبی ہوں