akaD shah ki zehanat

akaḌ shaah ne dostoñ se kahā

mujhe to zehānat huī hai atā

kahā dostoñ ne akaḌ shaah se

vo phañstā hai aksar akaḌ ho jise

akaḌ kar akaḌ shaah kahne lagā

akaḌ mere andar nahīñ hai zarā

maiñ kyoñ ḳhud ko be-aql-o-majnūñ kahūñ

tavāzo.a kī ḳhātir ġhalat kyoñ kahūñ

tabassum chhupā kar kahā dost ne

agar tū kahe āzmā.eñ tujhe

zahīñ hai to de ham ko tū bārah sau

samajhdār gar hai to de gyārah sau

akaḌ shaah bolā na mānūñgā haar

mire paas kal aanā ai mere yaar

maiñ teii.s dene ko tayyār huuñ

ki maiñ to zahīn aur samajhdār huuñ

kahā dost ne ai zahīñ chal batā

banī murġhī pahle ki anDā banā

akaḌ shaah pahle hañsā phir kahā

javāb us kā bilkul hai āsān sā

mujhe pahle murġhā banāyā gayā

varaq par phir anDā banāyā gayā

phir ik din usī dost se jab milā

to vo dost us se ye kahne lagā

bahut hī baḌe ho ga.e baal ab

hajāmat karāoge tum apnī kab

bulāyā tumheñ goyā hajjām ne

dukān us kī dekho vo hai sāmne

magar TuñD bilkul na karvānā tum

ki ho jaatī hai ThanD meñ siTTī gum

akaḌ shaah hajāmat karāne chalā

ki ye mashvara us ko achchhā lagā

jab agle din us dost se vo milā

use pā ke ganjā vo hairāñ huā

kahā dost ne bhaa.ī ye kyā kiyā

ye kis ne tujhe puurā ganjā kiyā

batāyā akaḌ shaah ne hañste hue

ki hajjām ke paas khulle na the

diye maiñ ne hajjām ko sau rūpa.e

kaTe the mire baal bas tiis ke

kahā maiñ is se na ghabrā zarā

tū sattar kā ab pher le usturā

'usāma' se qisse akaḌ shaah ke

na jāoge sun kar binā vaah ke

akaD shah ne doston se kaha

mujhe to zehanat hui hai ata

kaha doston ne akaD shah se

wo phansta hai aksar akaD ho jise

akaD kar akaD shah kahne laga

akaD mere andar nahin hai zara

main kyon KHud ko be-aql-o-majnun kahun

tawazoa ki KHatir ghalat kyon kahun

tabassum chhupa kar kaha dost ne

agar tu kahe aazmaen tujhe

zahin hai to de hum ko tu barah sau

samajhdar gar hai to de gyarah sau

akaD shah bola na manunga haar

mere pas kal aana ai mere yar

main teis dene ko tayyar hun

ki main to zahin aur samajhdar hun

kaha dost ne ai zahin chal bata

bani murghi pahle ki anDa bana

akaD shah pahle hansa phir kaha

jawab us ka bilkul hai aasan sa

mujhe pahle murgha banaya gaya

waraq par phir anDa banaya gaya

phir ek din usi dost se jab mila

to wo dost us se ye kahne laga

bahut hi baDe ho gae baal ab

hajamat karaoge tum apni kab

bulaya tumhein goya hajjam ne

dukan us ki dekho wo hai samne

magar TunD bilkul na karwana tum

ki ho jati hai ThanD mein siTTi gum

akaD shah hajamat karane chala

ki ye mashwara us ko achchha laga

jab agle din us dost se wo mila

use pa ke ganja wo hairan hua

kaha dost ne bhai ye kya kiya

ye kis ne tujhe pura ganja kiya

bataya akaD shah ne hanste hue

ki hajjam ke pas khulle na the

diye main ne hajjam ko sau rupae

kaTe the mere baal bas tis ke

kaha main is se na ghabra zara

tu sattar ka ab pher le ustura

'usama' se qisse akaD shah ke

na jaoge sun kar bina wah ke