akeli

ajnabī apne qadmoñ ko roko zarā

jāntī huuñ tumhāre liye ġhair huuñ

phir bhī Thahro zarā

sunte jaao ye ashkoñ-bharī dāstāñ

saath lete chalo ye mujassam fuġhāñ

aaj duniyā meñ merā koī bhī nahīñ

merī ammī nahīñ

mere abbā nahīñ

merī aapā nahīñ

mere nanhe se ma.asūm bhayyā nahīñ

merī ismat kī maġhrūr kirneñ nahīñ

vo gharauñdā nahīñ jis ke sā.e-tale

boriyoñ ke tarannum ko suntī rahī

phuul chuntī rahī

giit gaatī rahī

muskurātī rahī

aaj kuchh bhī nahīñ

aaj kuchh bhī nahīñ

merī nazroñ ke sahme hue ā.īne

merī ammī ke abbā ke aapā ke aur mere nanhe se ma.asūm bhayyā ke ḳhuuñ se

haiñ dahshat-zada

aaj merī nigāhoñ kī vīrāniyāñ chand majrūh yādoñ se ābād haiñ

aaj merī umañgoñ ke sūkhe kañval mere ashkoñ ke paanī se shādāb haiñ

aaj merī taḌaptī huī siskiyāñ ek sāz-e-shikasta kī fariyād haiñ

aur kuchh bhī nahīñ

bhuuk miTtī nahīñ

tan pe kapḌā nahīñ

aas ma.adūm hai

aaj duniyā meñ merā koī bhī nahīñ

aaj duniyā meñ merā koī bhī nahīñ

ajnabī apne qadmoñ ko roko zarā

sunte jaao ye ashkoñ-bharī dāstāñ

sunte jaao ye ashkoñ-bharī dāstāñ

saath lete chalo ye mujassam fuġhāñ

merī ammī bano

mere abbā banno

merī aapā bano

mere nanhe se ma.asūm bhayyā bano

mere ismat kī maġhrūr kirneñ bano

mere kuchh to bano

mere kuchh to bano

mere kuchh to bano

ajnabi apne qadmon ko roko zara

jaanti hun tumhaare liye ghair hun

phir bhi Thahro zara

sunte jao ye ashkon-bhari dastan

sath lete chalo ye mujassam fughan

aaj duniya mein mera koi bhi nahin

meri ammi nahin

mere abba nahin

meri aapa nahin

mere nanhe se masum bhayya nahin

meri ismat ki maghrur kirnen nahin

wo gharaunda nahin jis ke sae-tale

boriyon ke tarannum ko sunti rahi

phul chunti rahi

git gati rahi

muskuraati rahi

aaj kuchh bhi nahin

aaj kuchh bhi nahin

meri nazron ke sahme hue aaine

meri ammi ke abba ke aapa ke aur mere nanhe se masum bhayya ke KHun se

hain dahshat-zada

aaj meri nigahon ki viraniyan chand majruh yaadon se aabaad hain

aaj meri umangon ke sukhe kanwal mere ashkon ke pani se shadab hain

aaj meri taDapti hui siskiyan ek saz-e-shikasta ki fariyaad hain

aur kuchh bhi nahin

bhuk miTti nahin

tan pe kapDa nahin

aas madum hai

aaj duniya mein mera koi bhi nahin

aaj duniya mein mera koi bhi nahin

ajnabi apne qadmon ko roko zara

sunte jao ye ashkon-bhari dastan

sunte jao ye ashkon-bhari dastan

sath lete chalo ye mujassam fughan

meri ammi bano

mere abba banno

meri aapa bano

mere nanhe se masum bhayya bano

mere ismat ki maghrur kirnen bano

mere kuchh to bano

mere kuchh to bano

mere kuchh to bano