akeli raat

phir shab-e-ġham meñ idhar chāñd ko dekhā maiñ ne

apne maazī kī vahī dāstāñ dohrāte hue

chāñdnī-rāt meñ bādal ke sunahre TukḌe

terī yādoñ kī tarah chhā.e haiñ lahrāte hue

aaj us raat ke sannāTe meñ ai dost na pūchh

kitne uljhe haiñ fasāne tirī zulfoñ kī tarah

haa.e un tāroñ ne kis darja pareshān kiyā

jo nazar aate haiñ mujh ko tirī āñkhoñ kī tarah

tū nahīñ hai to ye sar-mast nazāre kyā haiñ

ruuTh jaatī haiñ bahāreñ bhī udhar gulshan se

qalb-e-be-tāb se aatī hai sadā.eñ hamdam

kitnī ummīdeñ haiñ vābasta tire dāman se

chāñd jis ne kabhī dekhā thā hameñ dast-ba-dast

aaj vo chāñd baḌhātā hai mirā dard-e-jigar

bhuul jaanā tujhe mumkin hai magar ai mahbūb

shart ye hai nazar aa.e na mujhe rū-e-qamar

phir shab-e-ġham meñ idhar chāñd ko dekhā maiñ ne

apne maazī kī vahī dāstāñ dohrāte hue

phir shab-e-gham mein idhar chand ko dekha main ne

apne mazi ki wahi dastan dohraate hue

chandni-raat mein baadal ke sunahre TukDe

teri yaadon ki tarah chhae hain lahraate hue

aaj us raat ke sannaTe mein ai dost na puchh

kitne uljhe hain fasane teri zulfon ki tarah

hae un taron ne kis darja pareshan kiya

jo nazar aate hain mujh ko teri aankhon ki tarah

tu nahin hai to ye sar-mast nazare kya hain

ruTh jati hain bahaaren bhi udhar gulshan se

qalb-e-be-tab se aati hai sadaen hamdam

kitni ummiden hain wabasta tere daman se

chand jis ne kabhi dekha tha hamein dast-ba-dast

aaj wo chand baDhata hai mera dard-e-jigar

bhul jaana tujhe mumkin hai magar ai mahbub

shart ye hai nazar aae na mujhe ru-e-qamar

phir shab-e-gham mein idhar chand ko dekha main ne

apne mazi ki wahi dastan dohraate hue