aks-dar-aks

na chāñd-māthā na tārā-ThoḌī

na jhīl-āñkheñ, na phūl-lab haiñ

na aañch azm-o-yaqīñ kī dil meñ

nuqūsh-e-ruḳh itne miT ga.e haiñ, nuqūsh kab haiñ

ai ā.īne vaqt ke! tujhe ek baar bhī

ik hasīñ chehra na de sake ham

magar haiñ ham ab bhī aks terā

vo aks hī to hamārā sach hai

hamārī āñkheñ bujhī huī haiñ magar yahī to haiñ terī āñkheñ

hamāre chehre sute hue haiñ, magar yahī to hai terā chehra

hamāre aañsū haiñ tere āñsū, hamāre dukh saare tere dukh haiñ

ki tū bhī sach bolne kā aadī hai, ham bhī aadī

ham apne chehre, ham apne bātin sañvār leñge

hamārī āñkhoñ meñ dekh apne hasīn fardā kā ik hayūlā

ki chāñd māthā hai, taarā thoḌī hai, jhiil āñkheñ haiñ, phuul lab haiñ

hasīn haiñ ham, hasīn hai tū hasīn sab haiñ

na chand-matha na tara-ThoDi

na jhil-ankhen, na phul-lab hain

na aanch azm-o-yaqin ki dil mein

nuqush-e-ruKH itne miT gae hain, nuqush kab hain

ai aaine waqt ke! tujhe ek bar bhi

ek hasin chehra na de sake hum

magar hain hum ab bhi aks tera

wo aks hi to hamara sach hai

hamari aankhen bujhi hui hain magar yahi to hain teri aankhen

hamare chehre sute hue hain, magar yahi to hai tera chehra

hamare aansu hain tere aansu, hamare dukh sare tere dukh hain

ki tu bhi sach bolne ka aadi hai, hum bhi aadi

hum apne chehre, hum apne baatin sanwar lenge

hamari aankhon mein dekh apne hasin farda ka ek hayula

ki chand matha hai, tara thoDi hai, jhil aankhen hain, phul lab hain

hasin hain ham, hasin hai tu hasin sab hain