aksar shab-e-tanhai mein

vo mirī zindagī kā afsāna

jab kabhī mujh ko yaad aatā hai

dil meñ ḳhushbū sī phail jaatī hai

koī ḳhvāboñ meñ muskurātā hai

shab kī tanhā.iyoñ meñ bhī aksar

koī āvāz mujh ko detā hai

naam le kar pukārtā hai mujhe

kabhī chupke se naam letā hai

phir mirī ḳhvāb-gāh meñ jaise

ek aahaT sunā.ī detī hai

phir dhuñdalkoñ meñ muskurātī huī

koī sūrat dikhā.ī detī hai

ḳhvāb hī ḳhvāb ye kahānī hai

maiñ ne dekhī haiñ jis ke saa.e meñ

nīm-vā be-ḳhayāl āñkhoñ se

zindagī kī hasīn tasvīreñ

ab bhī aksar ye sochtā huuñ maiñ

phuul koī chaman meñ khil jaatā

tū agar merī ham-safar hotī

zindagī ko nishān mil jaatā

shab kī tanhā.iyoñ meñ jaane kyoñ

mujh ko aksar ḳhayāl aatā hai

kaun hai ab mire ta.āqub meñ

tū nahīñ hai ye merā saaya hai

wo meri zindagi ka afsana

jab kabhi mujh ko yaad aata hai

dil mein KHushbu si phail jati hai

koi KHwabon mein muskuraata hai

shab ki tanhaiyon mein bhi aksar

koi aawaz mujh ko deta hai

nam le kar pukarta hai mujhe

kabhi chupke se nam leta hai

phir meri KHwab-gah mein jaise

ek aahaT sunai deti hai

phir dhundalkon mein muskuraati hui

koi surat dikhai deti hai

KHwab hi KHwab ye kahani hai

main ne dekhi hain jis ke sae mein

nim-wa be-KHayal aankhon se

zindagi ki hasin taswiren

ab bhi aksar ye sochta hun main

phul koi chaman mein khil jata

tu agar meri ham-safar hoti

zindagi ko nishan mil jata

shab ki tanhaiyon mein jaane kyon

mujh ko aksar KHayal aata hai

kaun hai ab mere taaqub mein

tu nahin hai ye mera saya hai