اکثر شب تنہائی میں

وہ مری زندگی کا افسانہ

جب کبھی مجھ کو یاد آتا ہے

دل میں خوشبو سی پھیل جاتی ہے

کوئی خوابوں میں مسکراتا ہے

شب کی تنہائیوں میں بھی اکثر

کوئی آواز مجھ کو دیتا ہے

نام لے کر پکارتا ہے مجھے

کبھی چپکے سے نام لیتا ہے

پھر مری خواب گاہ میں جیسے

ایک آہٹ سنائی دیتی ہے

پھر دھندلکوں میں مسکراتی ہوئی

کوئی صورت دکھائی دیتی ہے

خواب ہی خواب یہ کہانی ہے

میں نے دیکھی ہیں جس کے سائے میں

نیم وا بے خیال آنکھوں سے

زندگی کی حسین تصویریں

اب بھی اکثر یہ سوچتا ہوں میں

پھول کوئی چمن میں کھل جاتا

تو اگر میری ہم سفر ہوتی

زندگی کو نشان مل جاتا

شب کی تنہائیوں میں جانے کیوں

مجھ کو اکثر خیال آتا ہے

کون ہے اب مرے تعاقب میں

تو نہیں ہے یہ میرا سایہ ہے