المیہ

برف جمی ہے ذہنوں پر

دل میں آگ کے شعلے ہیں

میرے شہر کے دیوانے

یار بڑے جوشیلے ہیں

ساری وحشت ویرانی

در آئی ہے شہر دل میں

ہو کا عالم طاری ہے

گاؤں میں اور قصبوں میں

شوخی دوشیزاؤں کی

بچے بچے کی خوشیاں

ماں کی شفقت باپ کا پیار

لے گیا جانے کون ادھار

گھر گھر آتش بازی ہے

تانڈو ناچ جو جاری ہے

پھول کھلے ہیں بارودی

انگاروں کا موسم ہے

جشن بہاراں کیسا ہے

آنکھ کلی کی پر نم ہے

میں بھی رونا چاہوں پر

خون نہیں ہے آنکھوں میں

پانی روتے روتے تو

صدیاں مجھ کو بیت گئیں