alamiya

zindagī tadbīr-e-darmāñ ke sivā kuchh bhī nahīñ

ek paiham kāvish-e-jāñ ke sivā kuchh bhī nahīñ

apne bas meñ raushnī hai apne bas meñ tīrgī

zindagī ḳhud sa.ī-e-insāñ ke sivā kuchh bhī nahīñ

aql larzāñ har qadam par apnī nādārī se hai

jazba-e-dil shorish-e-jāñ ke sivā kuchh bhī nahīñ

ilm-o-irfāñ kī ham-āhañgī subūr-e-dil se hai

aql-o-dānish nūr-e-irfāñ ke sivā kuchh bhī nahīñ

apnī uljhan kā tasalsul apnī kāvish kā ma.aal

alamiya ḳhud sa.ī-e-insāñ ke sivā kuchh bhī nahīñ

nūr-e-irfāñ apnā hāsil apnā hāsil tīrgī

ye gurez-e-zindagī hai vo jihād-e-zindagī

ranj-o-rāhat kī kashākash se varā hai zindagī

ijtihād-e-ilm-o-fan se mā-sivā hai zindagī

ek an-dekhā bahāo ek an-thak silsila

zindagī ke tajribe se māvarā hai zindagī

ek hijr-e-be-amāñ hai ek koh-e-ātishīñ

soz-e-jāñ hai kyā shu.ūr-e-zīst kyā nā-āgahī

ik jihād-e-mustaqil ho yā gurez-e-mustaqil

apnī nādārī ke hāthoñ aadmī hai munfa.il

bārhā dasht-e-junūñ ko paaT kar bhī ai 'kalīm'

zindagī ko ham ne paayā maut hī se muttasil

alamiya ḳhud sa.ī-e-insāñ ke sivā kuchh bhī nahīñ

ik hijāb-e-ilm-o-irfāñ ke sivā kuchh bhī nahīñ

ik gurez-e-pur-ḳhajālat ke sivā kuchh bhī nahīñ

ik jihād-e-pur-shaqāvat ke sivā kuchh bhī nahīñ

zindagi tadbir-e-darman ke siwa kuchh bhi nahin

ek paiham kawish-e-jaan ke siwa kuchh bhi nahin

apne bas mein raushni hai apne bas mein tirgi

zindagi KHud sai-e-insan ke siwa kuchh bhi nahin

aql larzan har qadam par apni nadari se hai

jazba-e-dil shorish-e-jaan ke siwa kuchh bhi nahin

ilm-o-irfan ki ham-ahangi subur-e-dil se hai

aql-o-danish nur-e-irfan ke siwa kuchh bhi nahin

apni uljhan ka tasalsul apni kawish ka maal

alamiya KHud sai-e-insan ke siwa kuchh bhi nahin

nur-e-irfan apna hasil apna hasil tirgi

ye gurez-e-zindagi hai wo jihad-e-zindagi

ranj-o-rahat ki kashakash se wara hai zindagi

ijtihad-e-ilm-o-fan se ma-siwa hai zindagi

ek an-dekha bahao ek an-thak silsila

zindagi ke tajribe se mawara hai zindagi

ek hijr-e-be-aman hai ek koh-e-atishin

soz-e-jaan hai kya shuur-e-zist kya na-agahi

ek jihad-e-mustaqil ho ya gurez-e-mustaqil

apni nadari ke hathon aadmi hai munfail

barha dasht-e-junun ko paT kar bhi ai 'kalim'

zindagi ko hum ne paya maut hi se muttasil

alamiya KHud sai-e-insan ke siwa kuchh bhi nahin

ek hijab-e-ilm-o-irfan ke siwa kuchh bhi nahin

ek gurez-e-pur-KHajalat ke siwa kuchh bhi nahin

ek jihad-e-pur-shaqawat ke siwa kuchh bhi nahin