المیہ

زندگی تدبیر درماں کے سوا کچھ بھی نہیں

ایک پیہم کاوش جاں کے سوا کچھ بھی نہیں

اپنے بس میں روشنی ہے اپنے بس میں تیرگی

زندگی خود سعیٔ انساں کے سوا کچھ بھی نہیں

عقل لرزاں ہر قدم پر اپنی ناداری سے ہے

جذبۂ دل شورش جاں کے سوا کچھ بھی نہیں

علم و عرفاں کی ہم آہنگی صبور دل سے ہے

عقل و دانش نور عرفاں کے سوا کچھ بھی نہیں

اپنی الجھن کا تسلسل اپنی کاوش کا مآل

المیہ خود سعیٔ انساں کے سوا کچھ بھی نہیں

نور عرفاں اپنا حاصل اپنا حاصل تیرگی

یہ گریز زندگی ہے وہ جہاد زندگی

رنج و راحت کی کشاکش سے ورا ہے زندگی

اجتہاد علم و فن سے ماسوا ہے زندگی

ایک ان دیکھا بہاؤ ایک ان تھک سلسلہ

زندگی کے تجربے سے ماورا ہے زندگی

ایک ہجر بے اماں ہے ایک کوہ آتشیں

سوز جاں ہے کیا شعور زیست کیا نا آگہی

اک جہاد مستقل ہو یا گریز مستقل

اپنی ناداری کے ہاتھوں آدمی ہے منفعل

بارہا دشت جنوں کو پاٹ کر بھی اے کلیمؔ

زندگی کو ہم نے پایا موت ہی سے متصل

المیہ خود سعیٔ انساں کے سوا کچھ بھی نہیں

اک حجاب علم و عرفاں کے سوا کچھ بھی نہیں

اک گریز پر خجالت کے سوا کچھ بھی نہیں

اک جہاد پر شقاوت کے سوا کچھ بھی نہیں