alif aur be ke nam

jānāñ! kyā ye ho saktā hai

aaj kī shaam kahīñ nahīñ jaa.eñ

shor machāne vaale fiite

āvāzoñ se bhare tave

sab thoḌī der ko chup ho jaa.eñ

jānāñ! kyā ye ho saktā hai

is pyārī mashrūb ke paimāne bhī na chhalkeñ

jin ke bal-būte pe hamārī ḳhush-aḳhlāqī

aam huī hai

aur na mauzuāt ke laave muñh se ubleñ

aise log ki jin ke chehre bahut baḌe aur dil chhoTe haiñ

aaj hameñ sūrat na dikhā.eñ

thoḌī der ko tanhā.ī kī halkī ḳhunkī basī rahe

log gharoñ meñ aur botal almārī hī meñ sajī rahe

ham donoñ us kamre meñ hoñ

jis kī dīvāroñ pe hamāre sukh ke bandhan

tasvīroñ kī shakl meñ āvezāñ rahte haiñ

jis meñ rakkhe kaaTh ke ghoḌe

koT ke hāthī

sab ham ko takte rahte haiñ

jis meñ baiThī kāñch kī chiḌiyāñ

ham ko dekh ke Dar sī ga.ī haiñ

jis meñ rakkhī ka.ī kitābeñ

ham se ruuTh ke mar sī ga.ī haiñ

ham donoñ tanhā hoñ

thoḌī der ko gum-sum se baiTheñ

phir rafta rafta bāt-chīt ke

chhoTe chhoTe phuul khileñ

qurbat kī garmī se pashemānī ke aañsū

diye kī tarah se jal uTTheñ

jānāñ kyā ye ho saktā hai

ab bhī merā dil kahtā hai

shāyad aisā ho saktā hai

jaanan! kya ye ho sakta hai

aaj ki sham kahin nahin jaen

shor machane wale fite

aawazon se bhare tawe

sab thoDi der ko chup ho jaen

jaanan! kya ye ho sakta hai

is pyari mashrub ke paimane bhi na chhalken

jin ke bal-bute pe hamari KHush-aKHlaqi

aam hui hai

aur na mauzuat ke lawe munh se ublen

aise log ki jin ke chehre bahut baDe aur dil chhoTe hain

aaj hamein surat na dikhaen

thoDi der ko tanhai ki halki KHunki basi rahe

log gharon mein aur botal almari hi mein saji rahe

hum donon us kamre mein hon

jis ki diwaron pe hamare sukh ke bandhan

taswiron ki shakl mein aawezan rahte hain

jis mein rakkhe kaTh ke ghoDe

koT ke hathi

sab hum ko takte rahte hain

jis mein baiThi kanch ki chiDiyan

hum ko dekh ke Dar si gai hain

jis mein rakkhi kai kitaben

hum se ruTh ke mar si gai hain

hum donon tanha hon

thoDi der ko gum-sum se baiThen

phir rafta rafta baat-chit ke

chhoTe chhoTe phul khilen

qurbat ki garmi se pashemani ke aansu

diye ki tarah se jal uTThen

jaanan kya ye ho sakta hai

ab bhi mera dil kahta hai

shayad aisa ho sakta hai