aligarh chhoDne ke baad

ham-nashīñ raat kī maġhmūm ḳhamoshī meñ mujhe

duur kuchh dhīmī sī naġhmoñ kī sadā aatī hai

jaise jaatī huī afsurda javānī kī pukār

jis ko sun sun ke mirī ruuh laraz jaatī hai

jaise ghaTtī huī maujoñ kā utartā huā shor

mutriba jaise koī duur nikal jaatī hai

yā havāoñ kā tarannum kisī vīrāne meñ

jaise tanhā.ī meñ doshīza koī gaatī hai

maiñ bahut ġhaur se naġhmāt sunā kartā huuñ

sach to ye hai ki mirī jaan pe ban jaatī hai

baar baar uTh ke maiñ jaatā huuñ sadāoñ kī taraf

lekin ik shai hai jo vāpas mujhe le aatī hai

chauñk uThtā huuñ jab us ḳhvāb se hairāñ ho kar

phir mujhe dūsrī duniyā hī nazar aatī hai

aah, vo bhuuk ke maare hue afrād hañseñ

jin kī sūrat pe qanā.at bhī taras khātī hai

jaise ujḌī huī mahfil ke kuchh afsurda charāġh

raushnī meñ jinheñ har gaam pe Thukrātī hai

aah vo hazrat-e-insān hī kā dard o sitam

jis kā iz.hār bhī karte hue sharm aatī hai

vo tarāne jo sunā kartā huuñ tanhā.ī meñ

un tarānoñ meñ mujhe bū-e-vafā aatī hai

gā.uñgā naġhme vo ta.amīr-e-mohabbat ke liye

mai-kada chhoḌ diyā jin kī ishā.at ke liye

ham-nashin raat ki maghmum KHamoshi mein mujhe

dur kuchh dhimi si naghmon ki sada aati hai

jaise jati hui afsurda jawani ki pukar

jis ko sun sun ke meri ruh laraz jati hai

jaise ghaTti hui maujon ka utarta hua shor

mutriba jaise koi dur nikal jati hai

ya hawaon ka tarannum kisi virane mein

jaise tanhai mein doshiza koi gati hai

main bahut ghaur se naghmat suna karta hun

sach to ye hai ki meri jaan pe ban jati hai

bar bar uTh ke main jata hun sadaon ki taraf

lekin ek shai hai jo wapas mujhe le aati hai

chaunk uThta hun jab us KHwab se hairan ho kar

phir mujhe dusri duniya hi nazar aati hai

aah, wo bhuk ke mare hue afrad hansen

jin ki surat pe qanaat bhi taras khati hai

jaise ujDi hui mahfil ke kuchh afsurda charagh

raushni mein jinhen har gam pe Thukraati hai

aah wo hazrat-e-insan hi ka dard o sitam

jis ka izhaar bhi karte hue sharm aati hai

wo tarane jo suna karta hun tanhai mein

un taranon mein mujhe bu-e-wafa aati hai

gaunga naghme wo tamir-e-mohabbat ke liye

mai-kada chhoD diya jin ki ishaat ke liye